بەڕێوەبەری پۆلیسی ئەنبار بۆ ئاڤا باسی پێشێلکاریییەکان دەکات

ئاڤا نیوز

 

 بەڕێوەبەری پۆلیسی پارێزگای ئەنبار لە ڕۆژئاوای عێراق ڕایگەیاند، لەم کاتەدا پرۆسەی دەنگدان بۆ هەڵبژاردنی پەرلەمانی عێراق بەشێوەیەکی باش بەڕێوەدەچێت و پێشێلکارییەکانیش کە باسی لێوەدەکرێت، حاڵەتی تاکە کەسیین و  بەخێرایی کۆنتڕۆڵکراون.

 

لێدوانی فەرمی: لیوا عادل ڕەشید علوانی، بەڕێوەبەری پۆلیسی پارێزگای ئەنبار بە ئاڤا میدیای ڕاگەیاند، دەزگا ئەمنییەکان لە پۆلیس  و سەرجەم هێزەکانی دیکە، ئەرکیان پاراستنی بنکەکانی دەنگدانە و ڕێگریش دەکەن لەوەی فشار بخرێتەسەر دەنگدەران، "هەر کەسێکیش پێشێلکاریی بکات ڕووبەڕووی دەستگیرکردن و لێپرسینەوە" دەکرێتەوە.

 

ئاماژەی بەوەشکرد، ئەوەی بڵاوکراوەتەوە و باس لە بوونی پێشێلکاریی دەنگدان لە ئەنبار دەکرێت، زیاتر حاڵەتی تاکە کەسییە و بەخێرایی کۆنتڕۆڵکراوە، ئێستاش دۆخەکە بەشێوەیەکی باش بەڕێوەدەچێت و هیچ ئاستەنگیی و پێشێلکارییەکی ئەمنیش بوونی نییە.

 

باکگراوند: لە بەیانی ئەمڕۆوە هاوشێوەی ناوچەکانی دیکەی عێراق، لە پارێزگای ئەنبار 387 بنکەی دەنگدان و 1,820 وێستگەی هەڵبژاردن بەڕووی دەنگدەران لە سەرجەم قەزا و ناحیەکانی پارێزگاکە کراونەتەوە، بۆ دەنگدانی گشتیش لە پارێزگای ئەنبار 933 هەزار و 911 کەس مافی دەنگدانیان هەیە.