سوپای عێراق: ئەو سەربازەی هێرشی کردە سەر گەنجە کوردەکە دەستگیر کراوە

ئاڤا نیوز

قەیس محەممەداوی، جێگری فەرماندەی ئۆپەراسیۆنە هاوبەشەکانی عێراق ئاشکرای کرد، ئەو سەربازەی هێرشی کردە سەر هاووڵاتییەک لە خورماتوو بەهۆی ئەوەی ئاڵای هەرێمی کوردستانی بەرزکردووەتەوە، دەستگیر کراوە.

 

چیرۆکی سەرەکی: ڕۆژی سێشەممە، لە دەنگدانی گشتیی خولی شەشەمی پەرلەمانی عێراق، لە نزیک بنکەیەکی دەنگدان لە شارۆچکەی خورماتوو لە پارێزگای سەڵاحەددین، گەنجێکی کورد بەھۆی ھەڵگرتنی ئاڵای کوردستان، لەلایەن سەربازێکی سوپای عێراق هێرشی کرایەسەر.

 

ڕاگەیێنراوی فەرمی: قەیس محەممەداوی، جێگەری فەرماندەی ئۆپەراسیۆنە هاوبەشەکان و سەرۆکی لیژنەی باڵای ئەمنیی هەڵبژاردن لە کۆنگرەیەکی ڕۆژنامەوانیدا وەڵامی پرسیارێکی دەروون مەلا ناجی، پەیامنێری ئاڤا میدیای لە بەغدا دایەوە و ڕایگەیاند: ئەو کارمەندەی هێرشی کردە سەر گەنجێک دەستگیر کراوە و ڕەوانەی دادگە دەکرێت.

 

لەلایەکی دیکەوە: سەبارەت بە شەڕەکەی دوو ڕۆژی ڕابردوو لە کەرکووک کە دوو پۆلیس گیانیان لەدەست دا قەیس محەممەداوی وتی: ڕاپۆرتی وردەکارییەکانی شەڕەکە کەرکووکمان لایە، هەموو ئەوانەی چەکیان پێبووە و بەکاریان هێناوە دەستگیر کراون و لێکۆلێنەوەیان لەگەڵ کرا و گەیشتینە دەرەنجامی ورد و دواتر ڕەوانەی دادگە دەکرێن.

 

زانیاریی زیاتر: شەوی 10 لەسەر 11ی ئەم مانگە، چەند لایەنگرێکی حزبێکی کوردی لە کەرکووک بە شەقامی بەغدا تێدەپەڕن کە بارەگای حزبێکی تورکمانی لێیە، لەلایەن چەند لایەنگرێکی حزبە تورکمانییەکەوە پەلاماریان دەدرێن و سوکایەتییان پێدەکرێت، دواتر بەهۆی ئەمەوە ڕووبەڕووبوونەوە دروست دەبێت و دەبێتە هۆی تەقەکردن، دوای ئەوەی پۆلیسی فریاکەوتنی کەرکووک هەوڵی کۆنترۆڵکردنی دۆخەکە دەدات، لەلایەن کەسێک دوو لەو پۆلیسانە بە تەقەی ڕاستەوخۆ دەکوژرێن.