شاخەوان عەبدوڵڵا هۆکاری لەدەستدانی کورسییەکی کورد لە کەرکووک ئاشکرا دەکات

ئاڤا نیوز

 

سەرۆکی لیستی پارتی لە کەرکووک دەڵێت، "بەهۆی لەدەستدانی کورسییەکی پەرلەمانی عێراق لە کەرکووک، بڕیاماندا سەرجەم ئاهەنگ و خۆشیی و چالاکییەک ڕابگرین، ئەم بابەتەش بەبێ لێکۆڵینەوە لێپرسینەوە تێناپەڕێت".

 

چیرۆکی سەرەکی: دوای 24 کاتژمێر لە بەڕێوەچوونی هەڵبژاردنی خولی شەشەمی پەرلەمانی عێراق، ڕۆژی چوارشەممە، 12-11-2025، کۆمیسیۆنی باڵای هەڵبژاردنەکانی عێراق، ئەنجامە بەراییەکانی هەڵبژاردنی خولی شەشەمی ڕاگەیاند.

 

پەیامی فەرمی: شاخەوان عەبدوڵڵا، سەرۆکی لیستی پارتی دیموکراتی کوردستان لە کەرکووک، لە هەژماری تایبەتی خۆی لە تۆڕی کۆمەڵایەتیی فەیسبووک، وێڕای ئەوەی  سوپاسی خەڵکی کەرکووک و دەنگدەرانی پارتی کردووە بۆ سەرکەوتن، دەنگدان و ئەو متمانەیان کە بە لیستی 275 پارتیان کردووە، نووسیویەتی: "بەهۆی لەدەستدانی کورسییەکی کورد و پارتی لە شارەکە ، بڕیارماندا سەرجەم ئاهەنگ و خۆشیی و چالاکییەک ڕابگرین".

 

زانیاریی زیاتر: سەرۆکی لیستی پارتی لە کەرکووک ئاماژەشی بەوەکردووە، لەماوەی ڕابردوو باسمان لە مەترسیی لەدەستدانی کورسی شەشەمی کورد کردووە و دەمانگوت پێکهاتەی عەرەب بەشداریی کارایان دەبێت و پێویست دەکات سەرجەم کەرکووکییەکان بگەڕێنەوە کەرکووک و بەرنامەی چڕیش بۆ ئەو بابەتە دابنرێت ، بەڵام بەداخەوە کاری جدی و ئاسانکاری نەکرا بۆ ئەو بابەتە و ئەوەتا بەداخەوە بەهۆی کەمتر لە پێنج هەزار دەنگ کورسی دووەمی پارتی و کورسی شەشەمی کورد لەدەست درا، دڵنیام ئەم بابەتە بەبێ لێکۆڵینەوە و لێپرسینەوە تێناپەڕێت.

 

ژمارەکان وادەڵێن؛ بەپێی ئامارە بەراییەکانی کۆمیسیۆن دەنگی لایەنە کوردستانییەکان  لە کەرکووک بەمشێوەیە:

پارتی دیموکراتی کوردستان؛ 59 هەزار و  294 دەنگ 
یەکێتیی نیشتیمانیی کوردستان؛ 178 هەزار و 629 دەنگ 
نەوەی نوێ؛ 12 هەزار و 320 دەنگ