عامر حوسێن وەک بەتەمەنترین پەرلەمانتار سەرۆكایەتیی یەكەم دانیشتنی پەرلەمان دەكات

ئاڤا نیوز

دوای ئەوەی لە چەند ڕۆژی داهاتوو، كۆمیسیۆن ئەنجامی كۆتایی هەڵبژاردنی پەرلەمانی عێراق ئاشكرا دەكات، لە ئەگەری كۆبوونەوەی پەرلەمان، عامر حوسێن، پەرلەمانتاری هاوپەیمانی تەسمیم، وەک بەتەمەنترین پەرلەمانتار سەرۆكایەتیی دانیشتنەكە دەكات.

زانیاریی بەدەستهاتوو: عامر حوسێن جاسم فایز، لەدایكبوونی ساڵی 1948ەو كاندیدی دەرچووی هاوپەیمانیی تەسمیمە، لە بازنەی بەسڕە، بەهۆی ئەوە بەتەمەنترین پەرلەمانتاری خولی شەشەمی پەرلەمانی عێراق، لە یەكەم دانیشتنی پەرلەمان، سەرۆكایەتیی كۆبوونەوەكە دەكات و وەك سەرۆكی كاتیی پەرلەمان دەستبەكار دەبێت تاوەكوو ئەو كاتەی ئەندامانی پەرلەمان سەرۆك و جێگرانی سەرۆكی پەرلەمان هەڵدەبژێرن.

زانیاریی زیاتر: لە ئەگەر ئامادەنەبوونی عامر حوسێن بە هەر هۆكارێك بێت، نووری مالیكی، سەرۆكی هاوپەیمانیی دەوڵەتی یاسا و سەرۆكوەزیرانی پێشووتری عێراق كە یەكێكە لە كاندیدە دەرچووەكانی هەڵبژاردنی خولی شەشەمی پەرلەمان، سەرۆكایەتیی یەكەم دانیشتنی پەرلەمان دەكات وەك دووەم بەتەمەنترین پەرلەمانتار.

بەو پێیەی بەتەمەنترین كاندیدی سەركەوتووی ئەم هەڵبژاردنەیە، نوری مالیكی، سەرۆكی هاوپەیمانیی دەوڵەتی یاسا و سەرۆكوەزیرانی پێشووتری عێراق لە دوو خولدا، ئەگەر بچێتە پەرلەمان، سەرۆكایەتیی یەكەم دانیشتنی ئەم خولەی ئەنجوومەنی نوێنەرانی عێراق دەكات.

ئەوەی پێویستە بیزانیت:  بەپێی پەیڕەوی ناوخۆیی ئەنجوومەنی نوێنەرانی عێراقیش، تاوەكو هەڵبژاردنی دەستەی سەرۆكایەتی خولی نوێی پەرلەمان و ڕاسپاردنی لایەنی براوەی یەكەمی هەڵبژاردن بە دیاریكردنی دەستەی سەرۆكایەتییەكە، بەتەمەنترین كاندیدی دەرچوو، سەرۆكایەتیی یەكەم دانیشتنی پەرلەمانی عێراق دەكات.

لەلایەكی دیكەوە: لە پێنج خولی ڕابردووی پەرلەمانی عێراق لە ساڵی 2005ەوە تاوەكوو ساڵی 2021 ئەم كەسایەتییانەی خوارەوە بەهۆی ئەوەی بەتەمەنترین پەرلەمانتاری خولی خۆیان بوون، سەرۆكایەتیی یەكەم دانیشتنی پەرلەمانیان كردووە و وەك سەرۆكی كاتیی پەرلەمان دەستبەكار بوونە.

عەدنان پاچەچی – تەمەنی 82 ساڵ لە ساڵی 2005 سەرۆكی كاتیی خولی یەكەم

فوئاد مەعسووم – تەمەنی 72 ساڵ لە ساڵی 2010 سەرۆكی كاتیی خولی دووەم

مەهدی حافز – تەمەنی 71 ساڵ لە ساڵی 2014 سەرۆكی كاتیی خولی سێیەم

محەممەد عەلی – تەمەنی 79 ساڵ لە ساڵی 2018 سەرۆكی كاتیی خولی چوارەم

مەحموود مەشهەدانی – تەمەنی 73 ساڵ لە ساڵی 2021 سەرۆكی كاتیی خولیی پێنجەم