سەرۆك بارزانی: خەڵكی خۆشەویستی شاری سلێمانی شایستەی هەموو پێشكەوتن و پێشەنگییەكن

ئاڤا نیوز

لە 241ەمین ساڵیادی بنیاتنانی شاری سلێمانی، سەرۆك بارزانی پەیامێكی بڵاو كردەوە و تیایدا وێڕای پیرۆزبایی لە خەڵكی شارەكە، دەشڵێت خەڵكی شاری سلێمانی شایستەی هەموو جۆرە پێشكەوتن و پێشەنگین.

چیرۆکی سەرەکی: ڕۆژی هەینی 14-11-2025 بە بۆنەی 241 ساڵەی ساڵیادی دامەزراندنی شاری سلێمانی، بارەگای بارزانی پەیامێکی پیرۆزبایی سەرۆک بارزانی بڵاو کردەوە.

پەیامی فەرمی: سەرۆک بارزانی لە پەیامەکەیدا باسی لەوەکردووە: یادی 241 ساڵەی بوونیادنانی شاری سلێمانیدا پیرۆزباییەكی گەرم ئاراستەی خەڵكی خۆشەویستی سلێمانی، شاری شێخی نەمر و شاری هەڵمەت و قوربانی دەكەم.

هەر لە درێژەی ئەو پەیامەدا هاتووە: سلێمانی بەشی ئازیزی كوردستانە، شاری شەهیدانی ۹ی حوزەیران و مەنعە تەجەوەلەكەی 1963 و شاری بەگژداچوونەوەی ستەمكار و زۆردار و ڕژێمە یەك لەدوای یەكەكانە. سلێمانی وەك هەر شار و دەڤەرێكی تری كوردستان هەمیشە شوێنی هەڵكەوتنی ئەدیب و شاعیر و كەسایەتی و تێكۆشەر و شۆڕشگێڕانی كورد بووە و ڕۆڵی گەورەی لە بزووتنەوەی ڕزگاریخوازی كوردستاندا گێڕاوە.

 لە سەرەتای چلەكانی سەدەی بیستەمدا شاری سلێمانی بە هەموو چین و توێژەكانیەوە باوەشی گەرمی بۆ بارزانیی نەمر و بارزانییە دوورخراوەكان كردەوە، ئەو ڕێز و پێشوازییە هەرگیز لەبیر ناچێتەوە.

سەرۆك بارزانی دەشڵێت: لەو یادەدا هیوای ئارامی و ئاسوودەیی بۆ خەڵكی خۆشەویستی شاری سلێمانی دەخوازم و شایستەی هەموو جۆرە پێشكەوتن و پێشەنگین.