ئەمریكا لەبارەی كوژرانی گەنجێكی فەڵەستینی- ئەمریكی داوای ڕوونكردنەوە لە ئیسرائیل دەكات

ئاڤا دیجیتاڵ

دوێنێ دووشەممە ئەمریكا داوای لە ئیسرائیل كرد ڕوونكردنەوە بدات لەسەر مەرگی گەنجێكی 17 ساڵی فەڵەستینی-ئەمریكی، كە وا دیارە بە تەقەی ئیسرائیل كوژرابێت.

چیرۆكە سەرەكییەكە: میدیای فەڵەستین بڵاویكردووەتەوە: ڕۆژی هەینی تۆفیق عەجاق، كە هەرزەكارێكی تەمەن 17 ساڵانە، لە شارۆچكەی مەزرەعە لە ڕۆژهەڵاتی ڕامەڵڵا لە كەرتی ڕۆژئاوا كوژراوە.

ئەوەی پێویستە بیزانیت: عەجاق خاوەنی هاووڵاتینامەی ئەمریكییە و ئەمریكاش داوای ڕوونكردنەوە دەدات.

لێدوانە فەرمییەكان: ڤیدانت پەتێل، جێگری وەزیری دەرەوەی ئەمریكا، ڕایگەیاند "لە نزیكەوە لەگەڵ حكومەتی ئیسرائیلدا گفتوگۆ دەكەین و بەردەوامیش دەبین لەم گفتوگۆیانە بۆ ئەوەی زانیاریی زیاتر بەدەستبهێنین و داوامان كردووە بە زووترین كات بەدواداچوون بۆ مەرگی عەجاق بكرێت".

 گوتیشی "ئەمریكا لە هۆشداریدان لە هەڵكشانی كارەسات و توندوتیژییەكان لە كەرتی ڕۆژئاوا ڕوون بووە و داوامان لە هەموو لایەنەكان كردووە خۆیان لە هەڵكشانی گرژییەكان بە دوور بگرن".

پەتێل " بە مەرگی ئەو كوڕە زۆر نیگەران بووە، كە هاووڵاتییەكی ئەمریكی بووە" دووپاتیشی كردەوە " نووسینگەی ئەمریكی بۆ كاروباری فەڵەستینییەكان و باڵیۆزخانەی ئەمریكا لە ئۆرشەلیم لەگەڵ كەسوكاری گەنجەكەدا لە پەیوەندیدان".

گۆشەیەكی دیكەی دیمەنەكە: ئاژانسی فڕانس پرێس لە بارەی مەرگی ئەو گەنجەوە لە سوپای ئیسرائیلی پرسیوە، ئەوانیش باسیان لەوەكردووە " پۆلیسێك لە دەرەوەی كاتی فەرماندا بە ئاراستەی كەسێكی سڤیل تەقەی كردووە، كە گومانی ئەوەی لێی كردووە بەرد دەهاوێت".

باكگراوند: ئیسرائیل لە ساڵی 1967ەوە كەرتی ڕۆژئاوای دەست بەسەرداگرتووە، چەندین جار پێكدادان لە نێوان سوپا و فەڵەستینییەكاندا ڕوویداوە، بەڵام لەوكاتەوە كە جەنگی حەماس- ئیسرائیل دەستیپێكردووە پێكدادانەكان زیاتر بوون.

زانیاری زیاتر: وەزارەتی تەندروستیی فەڵەستین ڕایگەیاندووە، لە حەوتی تشرینی یەكەمی ساڵی ڕابردووەوە، كە جەنگەكە هەڵگیرساوە، تا ئێستا سوپای ئیسرائیل نزیكەی 360 كەسیان لە كەرتی ڕۆژئاوا كوشتووە.