شارەوانی بنەسڵاوە هۆشداری بەو کەسانە دەدات کە کڕین و فرۆشتن بە زەوییەکانیان دەکەن

ئاڤا نیوز

لە ماوەی ڕابردوو نزیکەی پێنج هەزار زەوی لە سنووری شارەوانی بنەسڵاوە بەسەر فەرمانبەران دابەشکرا، شارەوانی بنەسڵاوە هۆشداری دەدات لە کڕین و فرۆشتن بە زەوییەکان تاوەکو مامەلەکان تەواو دەکرێن.

وێنە گەورەکە: دوای بڕیاری سەرۆکوەزیران مەسرور بارزانی، دابەشکردنی زەوی بەسەر فەرمانبەران دەستیپێکرد، دوای دابەشکردنی زەوی لەهەر ناوچەیەک دەبێت نەخشەسازی بۆ بکرێت و زەوییەکان بەناوی فەرمانبەرەکە بکرێت، پێش ئەوەی زەوییەکان بەناو بکرێت نابێت کڕین فرۆشتنی پێ بکرێت.

لێدوانی فەرمی: زریان سەباح، سەرۆکی شارەوانی بنەسڵاوە، بە ئاڤای ڕاگەیاند، ئاگاداری ئەو فەرمانبەرانە دەکەینەوە کە زەوییان وەرگرتووە مامەڵەی کڕین و فرۆشتن لە ئیستادا بەم زەوییانە نەکەن، لەبەرئەوەی دەبێتە هۆی کێشە لە داهاتوودا تاوەکو دەبنە خاوەنی سەنەد (تاپۆ)‌ـی خۆتان، فەرمانبەران ئاگادار دەکەینەوە کە ووردبینی ناوەکان لە داهاتوو دەست پێ دەکات لە ئەگەری سوودمەندبوونیهەر فەرمانبەرێک لە پێشتر ئەوا زەوییەکەی لێ وەردەگیرێتەوە، تووشی سزای یاسای دەبێت.

زانیاریی زیاتر: زریان سەباح، دەڵێت، زانیاریمان هەیە بەشێک لە فەرمانبەران کڕین و فرۆشتن بە زەوییە نوێکان دەکەن بۆیە هۆشداریان پێ دەدەین لەسەر ئەو کارە، ئێستا سەرقاڵی چەسپاندنی نەخشەکەین نزیکەی مانگێکی دەوێت تاوەکو کارەکانی تەواو دەکرێت، دوای نەخشەکە ڕێکارەکان دەستپێدەکات و ئاگاداری فەرمانبەران دەکرێتەوە کە مامەڵەی تاپۆکردنی زەوییەکان دەست پێ دەکەن.