لە لیبیا 37 کۆچبەری کورد کەوتوونەتە دەستی میلیشیاکان

ئاڤا نیوز

بەپێی ئەو زانیاریەی دەست ئاڤا کەوتووە 37 کۆچبەری کوردی خەڵکی شارە جیاوازەکانی هەرێمی کوردستان، کەوتوونەتە دەستی میلیشیاکان لە لیبیا و چارەنووسیان نادیارە.

وێنە گەورەکە: وڵاتی لیبیا بووە بە یەکێک لە ڕێڕەوە دیارەکانی گەیشتن بە وڵاتانی ئەوروپا بە ڕێگەی نایاسایی، بەشێک لە گەنجانی هەرێمی کوردستان و وڵاتانی دیکەی ناوچەکە، بۆ گەیشتن بە کەناراوەکانی ئیتاڵیا ڕێگای ئەو وڵاتە بەکاردەهێنن، ئەو گەنجانە لەلایەن هێزە ئەمنییەکان دەستگیر دەکرێن، ڕووبەڕووی دۆخی نەخوازراو و ئەشکەنجەدان، تەنانەت گیانلەدەستدان دەبنەوە و تەرمەکانیان دەگەڕێنرێتەوە نێو کەسوکاریان.

زانیاریی بەدەستهاتوو: ئاڤا میدیا زانیویەتی 37 کۆچبەری کورد لەلایەن میلیشیاکانەوە لە شاری "بیر غەنم"ـی لیبیا کە نزیکەی 90 کیلۆمەتر لە ناوەندی تەرابلوسەوە دوورە دەستگیر کراون، میلیشیاکان ئەو کۆچبەرانەیان بردووەتە شوێنێکی نهێنی و چارەنووسیان نادیارە.

لەلایەکی دیکەوە: لەبارەی ئەو 12 کۆچبەرە کوردەی لەماوەکانی ڕابردوو لە کەناراوەکانی شاری میسراتەی لیبیا دەستگیر کرابوون، ئاڤا زانیویەتی لێپێچینەوەیان لەگەڵ کراوە و هەوڵەکانی گەڕانەوەیان دەستیپێکردووە، بڕیارە مانگی داهاتوو لەڕێگەی فڕۆکەخانەی نێودەوڵەتیی هەولێرەوە بگەڕێنرێنەوە هەرێمی کوردستان.