سەرۆک بارزانی: سیاسەتی خۆسەپاندن لە عێراق و ڕۆژهەڵاتی ناوەڕاست سەرکەوتوو نەبووە

ئاڤا نیوز

سەرۆک بارزانی، لەمیانەی بەشداریکردن لە شەشەمی کۆڕبەندی مێپس، وتارێکی پێشکەشکرد و ئاماژەی بەوەدا، عێراق لەسەر بنەمای هاوبەشی دامەزرا، بەڵام بەرامبەر ئەوە کیماباران کراین، نابێت ئەو کێشە و گرفتانەی ئێمەت تێدا ژیاین بۆ نەوەی داهاتوو جێبهێڵین.

چیرۆکی سەرەکی: پێشنیوەڕۆی ئەمڕۆ سێشەممە، بە ئامادەبوونی 150 سەرکردەی، ناوەخۆیی، هەرێمی و نێودەوڵەتی لە 25 وڵاتی جیاواز، شەشەمی کۆڕبەندی ئاشتی و ئاسایشی ڕۆژهەڵاتی ناوەڕاست، لە زانکۆی ئەمریکی دهۆک دەستیپێکرد، سەرۆک بارزانی و سەرکردە باڵاکانی عێراق وتاریان دەبێت.

لێدوانی فەرمی: سەرۆک بارزانی، وێڕای پیرۆزبایی لەپرۆسەی هەڵبژاردن و  لایەنە سەرکەوتووەکان جەختی لەوەکردەوە کە هیچ کاتێک سیاسەتی خۆسەپاندن نە لە عێراق و نە لە هیچ ناوچەیەکی دیکەی ڕۆژهەڵاتی ناوەڕاست سەرکەوتوو نەبووە، پێویستە هەموومان هەوڵ بدەین دەوڵەتی دامەزراوەیی دروست بکرێت."

سەرۆک بارزانی لە بەشێکی دیکەی وتارەکەیدا نیگەرانی خۆی سەبارەت بە یاسای هەڵبژاردن نەشاردەوە و گوتی ، "یاسای هەڵبژاردن هیچ دادوەرییەکی تێدا نیە."

سەرۆک بارزانی لە وتارەکەی ئەمانەشی گوت:-

ــ خەڵکی عێراق لە دروشم بێزار بووە و خزمەتگوزاری دەوێت. 

ــ گەورەترین مەترسی ماددەی هۆشبەرە و پێویستە لە سەرتاسەری عێراق ڕووبەڕووی ببینەوە، پێویستە هەماهەنگی زۆر لەنێوان حکومەتی هەرێمی کوردستان و عێراق هەبێت بۆ ڕووبەڕووبونەوەی ماددەی هۆشبەر.

ــ لە کوردستان شانازی بە فەرهەنگی بەیەکەوە ژیان دەکەین و پێویستە لە عێراق فەرهەنگی بەیەکەوەژیان جوانتر بکەین.

ــ خزمەتگوزاری بۆ هەموو شارەکانی عێراق وەک یەک پێویستە، خەڵک لە دروشم بێزاربووە و خزمەتگوزاری دەوێت.

ــ دەستووری عێراق پەیوەندی نێوان هەرێمی کوردستان و بەغدا ڕێکخستووە، هیوادارم  هەڵبژاردن ببێتە چارەسەرکردنی هەموو کێشەکانی نێوانمان.

ــــ پێویستە ماددەی 140 جێبەجێ بکرێت و دوانەخرێت.

ــ داعش ماوە و پێویستیمان بە هاوکاری هاوپەیمانانە.

ــ پشتیوانی لە پرۆسەی ئاشتی تورکیا دەکەین.