سەرۆک بارزانی پەیامێک ئاراستەی لایەنە کوردستانییەکان دەکات

ئاڤا نیوز

سەرۆک بارزانی، لەمیانەی بەشداریکردن لە شەشەمی کۆڕبەندی مێپس، وتارێکی پێشکەشکرد و پەیامێکی سەبارە بە پێکهێنانی کابینەی نوێی حکومەتی هەرێمی کوردستان ئاراستەی لایەنەکان کرد و ئاماژەی بەوەدا کە "هەلومەرجەکانی پێکهێنانی کابینەی نوێ گۆڕانکاری بەسەردا هاتووە."

وێنە گەورەکە: زیاتر لە ساڵێک بەسەر هەڵبژاردنی خولی شەشەمی پەرلەمانی کوردستان تێپەڕدەبێت، پارتی و یەکێتی وەک دوو لایەنی سەرەکی پێکهێنەری حکومەت زنجیرەیەک کۆبوونەوەیان کرد، بەڵام نەگەیشتنە پێکهێنانی حکومەت، لەماوەی بانگەشەی هەڵبژاردن بۆ پەرلەمانی عێراق، سەرۆک بارزانی چەند جارێک لایەنەکانی ئاگادارکردەوە تەئکیدی لەوەکردەوە کە پێش هەڵبژاردن بێن بۆ پێکهێنانی حکومەت، چونکە دوای هەڵبژاردن هەلومەرجەکە دەگۆڕێت.

لێدوانی فەرمی: سەرۆک بارزانی، لە بەشێکی وتارەکەی سەبارەت بە پێکهێنانی کابینەی دەیەمی حکومەتی هەرێمی کوردستان قسەیکرد و گوتی، "داوا لە هەموو لایەنە کوردستانییەکان دەکەم جارێکی دیکە بێنەوە پێش بۆ پێکهێنانی کابینەی نوێی حکومەتی هەرێمی کوردستان."

سەرۆک بارزانی، گوتیشی، "دوای هەڵبژاردنی عێراق هەڵومەرجەکانی پێکهێنانی کابینەی نوێ گۆڕاوە، لایەنەکان بەگوێرەی (ئسیتحقاقی هەڵبژاردن) مامەڵەیان لەگەڵ دەکرێت."