هامبورگ نمایشکردنی فیلمی کوردی لە ئامێز دەگرێت

ئاڤا نیوز

 

16ـەمین فێستیڤاڵی فیلمی كوردی هامبۆرگ دەستیپێكرد، سەرەتا بە میوزیكی كوردی لەلایەن هونەمەندی باكووری كوردستان  جەمیل كۆچگەری و دواتریش دەستپێكی فیلمەكان بە فیلمی ذا ڤێرجن ئاند چایەڵد، كە باس لە ژیانی كچێكی كوردی ئێزدی دەكات، فێستیڤاڵەكە دەستیپێكرد.

 

چیرۆكی سەرەكی: فێستیڤاڵەكە بۆ ماوەی پێنج ڕۆژ بەردەوام دەبێت و 21 فیلم لە چوار پارچەی كوردستانەوە بەشداریی فێستیڤاڵەكەیان كردووە كە فیلمەكان بەم جۆرەن: سێ فیلمی درێژ و 12 فیلمی دۆكیومێنتاری و شەش كورتە فیلم.

 

لێدوانی فەرمی: ڕەوەند جەواد، بەرپرسی میدیایی فێستیڤاڵەكە بە ئاڤا میدیای ڕاگەیاند، ئەمساڵ جیاواز لە ساڵانی ڕابردوو فێستیڤاڵەكەمان بۆ ئەو گەنجانەی كە توانای كڕینی تیكتی فیلمەكانیان نیە كردومانە بە بێ بەرامبەر.

رەوەند جەواد، وتیشی، دەرهێنەری دیاری باشووری كوردستان، سەهیم عومەر خەلیفە، سەرۆكی لیژنەی دادوەریی فێستیڤاڵەكەیە و لە كۆتا ڕۆژدا خەڵاتەكانی فێستیڤاڵەكە بەسەر فیلمە براوەكاندا دابەش دەكرێن.

 

باكگراوند: 16ـەمین فێستیڤاڵی فیلمی كوردی هامبۆرگ لە وڵاتی ئەڵمانیا بەڕێوەدەچێت و ساڵانە یەكێكە لەو چالاكییە هونەریی و كولتوورییانەی لەلایەن ڕێكخراوی (كورد ئاڕت و موت تیاتەر)ـەوە سازدەدرێت و هاندەرێكی گرنگە بۆ فیلمسازانی كورد بۆئەوەی بەرهەمەكانیان بۆ ناوەندی هونەریی ئەرورپا و جیهان نمایش بكەن و خەڵاتی شایستە وەربگرن.