تۆمەتێک ئاراستەی دەستەی وەبەرهێنان و نووسینگەی سوودانی دەکرێت

ئاڤا نیوز

ئەندامێکی پێشووی لیژنەی کشتوکاڵ و ئاو لە پەرلەمانی عێراق، لایەنەکانی نێو دەستەی وەبەرهێنان و چەند کەسایەتییەکی نووسینگەی سەرۆکوەزیرانی عێراق بە دەستبەسەرداگرتنی زەوییە کشتوکاڵییەکانی پارێزگای کەربەلا تۆمەتبار دەکات.

چیرۆکی سەرەکی: بە مەبەستی چارەسەرکردنی قەیرانی نیشتەجێبوون، حکومەتی عێراق کار لەسەر گۆڕینی ڕەگەزی ئەو زەوییانە دەکات کە بۆ کشتوکاڵ دەست نادەن، بەڵام بەگوێرەی هەندێک ڕاپۆرتی میدیایی و چاودێران، چەندین لایەن ئەم دۆسیەیە بۆ بەرژەوەندیی کەسی و حزبی دەقۆزنەوە.

لێدوانی فەرمی: ئیبتیسام هیلالی، پەرلەمانتاری پێشوو و ئەندامی لیژنەی کشتوکاڵ و ئاو رایگەیاند: چەند لایەنێک لە دەستەی وەبەرهێنان بە هەماهەنگی لەگەڵ کەسانێک لە نووسینگەی سەرۆکوەزیران، بە مەبەستی بازرگانی و لەناوبردنی کەرتی کشتوکاڵ، دەستیان بەسەر ڕووبەرێکی فراوانی زەوی کشتوکاڵی لە پارێزگای کەربەلا گرتووە.

زانیاریی زیاتر: هیلالی ڕوونیشیکردەوە، ئەو لایەنانە ڕەگەزی بەشێک لە زەوییەکان لە کشتوکاڵییەوە بۆ نیشتەجێبوون (تاپۆی صرف) گۆڕیوە، جگە دروستکردنی چەندین کۆمەڵگەی نیشتەجێبوون و فرۆشتنەوەیان بە هاووڵاتیان بە نرخی خەیاڵی کە زۆر لە نرخی ئاسایی خۆیان بەرزترە.