ڕاپۆرتێک: مالیکی تەنیا خاوەنی 10 کورسی پەرلەمانە و پێگەی بۆ دانوستان لاوازە

ئاڤا نیوز

ڕۆژنامەی "شەرقولئەوسەت"ی سعوودی لە ڕاپۆرتێکدا تیشکی خستووەتە سەر کێشەیەکی ناوخۆیی هاوپەیمانیی دەوڵەتی یاسا و ئاماژەی بەوە کردووە کە نوری مالیکی، سەرۆکی هاوپەیمانییەکە، تەنيا خاوەنی 10 کورسی پەرلەمانییە، ئەمەش وایکردووە پێگەی لە دانوستانەکاندا لاواز بێت

وێنە گەورەکە: چوارچێوەی هەماهەنگی خاوەنی نزیکەی 175 کورسیی پەرلەمانییە، بەمەش بەپێی ماددەی 76ـی دەستوور خۆی وەک گەورەترین فراکسیۆنی پەرلەمان بۆ پێکهێنانی حکومەت یەکلایی کردووەتەوە، بەڵام بەپێی چاودێران بوونی نزیکەی 20 سەرکردە و کەسایەتی جیاواز لەو بەرەیەدا وایکردووە مەترسی دروستبێت لەسەر پەکخستنی هەوڵەکان بۆ دیاریکردنی سەرۆکوەزیرانی داهاتوو.

پێدراوه‌ ڕاسته‌كان: بەگوێرەی ڕاپۆرتەکە، سەرەڕای ئەوەی دەوڵەتی یاسا 30  کورسی بەدەستهێناوە و لە نێو چوارچێوەی هەماهەنگیـدا پلەی دووەمی هەیە، بەڵام لە ڕاستیدا مالیکی و حیزبی دەعوە تەنیا نزیکەی 10 کورسییان لە کۆی کورسییەکانی ناو هاوپەیمانییەکە هەیە.

ژماره‌كان واده‌ڵین: ڕۆژنامەکە بەپێی ئەنجامی هەڵبژاردنەکان وردەکاریی دابەشبوونی کورسییەکانی هاوپەیمانی دەوڵەتی یاسای ئاشکرا کردووە، حیزبی فەزیڵە 12 کورسی لە پشکی دەوڵەتی یاسا بردووە و ئەبو ئالا وەلائی، ئەمینداری کەتائیبی سەید شوهەدا خاوەنی نزیکەی هەشت کورسییە لەنێو لیستەکەدا، بەپێی شەرقولئەوسەت ئەم دابەشبوونە وایکردووە توانای دانوستانی مالیکی لاواز دەربکەوێت.