لەمەودوا لە قوتابخانەکانی هەرێمی کوردستان سوود لە ژیریی دەستکرد وەردەگیرێت

ئاڤا نیوز

وەزارەتی پەروەردە پلاتفۆڕمی (قوتابخانەکەم)ـی پەرەپێداوە وەک پلاتفۆڕمێکی نوێی پێشکەوتووی دیجیتاڵیی بۆ خوێندن لە قوتابخانەکان، هەموو بابەت و وانەکانی خوێندنی ناو پۆل کراون بە دیجیتاڵی بە شێوەزارەکانی سۆرانی، بادینی و زمانی ئینگلیزی.

چیرۆکی سەرەکی: وەزارەتی پەروەردەی حکومەتی هەرێمی کوردستان، لەسەر بنەمای چێژبەخشی فێربوون بە کردار بۆ وانە گوتنەوە و پرۆسەی فێربوون لە قوتابخانەکاندا، پلاتفۆرمێکی  دیجیتاڵی پێشکەوتووی ڕاگەیاندووە و دەستی بە پڕۆسەکە کردووە.

ڕاگەیێنراوی فەرمی: وەزارەتی پەروەردەی حکومەتی هەرێمی کوردستان ڕایگەیاند، ئێستا سیستمەکە بۆ پۆلی یەک تا سێی بنەڕەتی بەشێوەی ئەزموونکاری کارایە و پۆلەکانی چوار بۆ پێنجی بنەڕەتیش لەژێر کارکردندان بۆ کۆتایی ساڵی 2026 هەموو پۆل و قۆناغەکانی خوێندنی بنەڕەتی تەواو دەکرێن.

زانیاریی زیاتر: ناوی پلاتفۆرمەکە (قوتابخانەکەم)ـە، تیمێکی شارەزا و بە ئەزموونی ناوخۆیی و بە هاوبەشی ڕێکخراوی یونسێف بەڕێوەدەبرێ و حکومەت سمارت بۆردی پێویستی دابینکردووە بۆ ئەو قوتابخانە حکومیانەی ئەم پرۆسەیەیان تێدا ئەنجام دەدرێت.

بۆچی گرنگە: لە پلاتفۆرمەکەدا (ژیری دەستکردی زانا)ـی تێدایە، وەڵامی پرسیاری بابەتە پەروەردەییەکان دەداتەوە و ڕێنوێنی مامۆستا و قوتابیان دەکات، قوتابیان دەتوانن بەیەکەوە ئەرکی ماڵەوە بخوێنن و بەئاسانی وەڵامی پرسیارەکان بدەنەوە، هاوکاری ئەو دایک و باوکانە دەبێت کە وەک پێویست بە پرۆسەی خوێندەواری تێنەپەڕیوون، بۆ ئەو قوتابخانانەی تاقیگەیان نیە دەتوانن سوود لە  تاقیگە گریمانەیییەکان وەربگرن.