لە ڕووداوێکی هاتووچۆدا حەوت ئەندامی یەک خێزان برینداربوون

ئاڤا نیوز

لە کەلار ئۆتۆمبێلێک کۆنترۆڵ لەدەستدەدات و وەردەگەڕێت. لە ڕووداوەکە حەوت کەس بریندارن، یەکێک لە بریندارەکان بەهۆی سەختی برینەکەی ڕەوانەی نەخۆشخانەی سلێمانی کراوە.

چیرۆکی سەرەکی: پاش نیوەڕۆی ئەمڕۆ هەینی لە ناو شاری کەلار و لەڕێگەی گوندی لانە سیتی، ئۆتۆمبێلێک، بە ئاراستەی ڕێگای شەستی هاتووە، کۆنترۆڵی لەدەستداوە و بەو هۆیەوە وەرگەڕاوە.

ڕاگەیێنراوی فەرمی: ڕاگەیاندنی هاتووچۆی گەرمیان بڵاوی کردووەتەوە، به هۆی ڕووداوەکەوە حەوت کەس برینداربوون، لەوانە دووانیان منداڵن.

لێدوانی فەرمی: ڕەفیق قادر، بەڕێوەبەری فریاکەوتنی کەلار بە ئاڤای ڕاگەیاند: یەکێک لە بریندارەکان بەهۆی سەختی برینەکەیەوە ڕەوانەی سلێمانی کراوە، شەش بریندارەکەی دیکەش دۆخی تەندروستیان جێگیرە و ئێستا چارەسەری پزیشکیان بۆ دەکرێت.

زانیاریی پەیامنێر: بەپێی زانیارییەکانی هونەر فارس، پەیامنێری ئاڤا لە گەرمیان، سەرجەم بریندارەکان ئەندامی یەک خێزانن و ئافرەتێک ئۆتۆمبێلەکەی لێ خوڕیوە، خەسووی و منداڵەکانی سەرنشین بوونە، بەهۆی سەختی برینەکەی شۆفێرەکە ڕەوانەی نەخۆشخانەی فریاکەوتنی سلێمانی کراوە.

ئەمەش بزانە: بەمەبەستی زانینی هۆکار و چۆنیەتی ڕووداوەکە، تیمی هاتووچۆی گەرمیان لێکۆڵینەوەیان لەڕووداوەکە دەستپێکردووە.