بەهۆی شەڕی خێڵکەی لە میسان مانگانە 15 خێزان ئەو شارە جێدەهێڵن

ئاڤا نیوز

بەگوێرەی سەرچاوەکانی هەواڵ پارێزگای میسان لە باشووری عێراق، شەڕ و ناکۆکیی خێڵەکی لە هەڵکشاندایە و بەو هۆیەوە مانگانە نزیکەی 15 خێزان سەری خۆیان هەڵدەگرن و شارەکە جێدەهێڵن.

لێدوانی فەرمی: کازم دەوای ساعدی، ناوبژیوانی خێڵەکی لە پارێزگای میسان ئاشکرای کردووە، دۆخی ئەمنیی میسان بەردەوام لە دابەزیندایە و ئەو وتە باوەی دەڵێت؛ "ئەگەر سەلامەتیت دەوێت بڕۆ بۆ میسان" بووەتە بەڵا، سەرۆکی شارەوانی پێی وتم کە مانگانە نزیکەی 15 خێزان بەهۆی ململانێی خێڵەکییەوە میسان بەجێدەهێڵن و لە هەموو پارێزگایەکدا خێزانی میسان بوونیان هەیە.

ناوبراو دەشڵێت: سیاسەت هاتە ناو خێڵەکانەوە و سەرۆک خێڵەکان لە هەڵبژاردنەکاندا کاندید کران، بەڵام بێ هیوا بوون، چونکە چاوەڕێی ئەوەبوون لەلایەن خێڵەوە هەڵبژێردرێن و هەڵنەبژێردران، ئەمڕۆ خەڵکی مەیلی بەرەو کۆمەڵگەی مەدەنی هەیە و ڕقیان لە خێڵ و شێخەکانە.

گۆشەیەکی دیکەی دیمەنەکە: ساعدی ئاماژە بەوە دەکات، ئەفسەرانی ئەمنی و دادوەران لەلایەن بەکارهێنەر و بازرگانانی تێوەگلاو لە ماددە هۆشبەرەکان دەکرێنە ئامانج. دوایین ڕووداو چەند ڕۆژێک لەمەوبەر، دادوەرێک لەناو ئۆتۆمبێلەکەیدا بە بۆمبی چێنراو کراوەتە ئامانج. ئەگەر ئۆتۆمبێلەکەی زرێپۆش نەبوایە دەکوژرا، "کوا ئەمنیەت ئەگەر بە ئامانجگرتن بگاتە دادوەران".