مارک ساڤایا: بۆ پێکهێنانی حکومەتی نوێی عێراق ئەمریکا ڕێگا بە هیچ دەستوەردانێکی دەرەکی نادات

ئاڤا نیوز

نێردەی تایبەتی ترەمپ بۆ عێراق لە تۆڕی ئێکس ڕایگەیاند، "با ئەوە ڕوون بێت، ئەمریکا ڕێگا بە دەستوەردانی دەرەکی نادات لە پێکهێنانی حکومەتی نوێی عێراق".

بڵاوکراوەی فەرمی: مارک ساڤایا، نێردەی تایبەتی ترەمپ بۆ عێراق لە هەژماری خۆی لەسەر تۆڕی ئێکس پەیامێکی بڵاوکردەوە و دەڵێت: "بە پەرۆشەوە چاوەڕێی ئەوەم بەمنزیکانە سەردانی عێراق بکەم و لەگەڵ سەرکردە باڵاکان کۆببمەوە. عێراق لە ماوەی سێ ساڵی ڕابردوودا پێشکەوتنی بەرچاوی بەخۆیەوە بینیوە و هیوادارین لە مانگەکانی داهاتووشدا ئەم پێشکەوتنە بەردەوام بێت. لە هەمان کاتدا، بە وردی چاودێریی پرۆسەی پێکهێنانی حکومەتی نوێ دەکەین. با ئەوە ڕوون بێت، ئەمریکا قبوڵ ناکات و ڕێگە بە هیچ دەستێوەردانێکی دەرەکی نادات لە داڕشتنی حکومەتی نوێی عێراقدا".

ئەوەی پێویستە بیزانیت: ڕۆژی 19-10-2025 دۆناڵد ترەمپ، سەرۆکی ئەمریکا ڕایگەیاند، بۆ کاروباری عێراق مارک ساڤایا دەستنیشان دەکات. مارک لە کەمپەینی هەڵبژاردنی سەرۆکایەتی ترەمپ ڕۆڵێکی زۆری هەبووە، هاوکات لە ئازادکردنی ئیلیزابێس تسورکۆڤدا ڕۆڵێکی سەرەکی هەبووە، کاتێک لە مانگی ئەیلولی ئەمساڵ لەدەستی گرووپە چەکدارەکانی عێراق ئازاد کرا.|

باکگراوند: ڕۆژی 11-11-2025 هەڵبژاردنی پەرلەمانی عێراق بەڕێوەچوو. دوای پەسەندکردنی ئەنجامی کۆتایی هەڵبژاردن، ئێستا لایەنەکان کەوتوونەتەخۆ بۆ پێکهێنانی کابینەی نوێی حکومەتی عێراق.