حەشدی شەعبی لە بەغدا هەوڵی دەستبەسەرداگرتنی زەویی جووتیاران دەدات

ئاڤا نیوز

 

لە ناوچەی جادریەی شاری بەغدا گرژی و ئاڵۆزی لەنێوان هێزێکی چەکدار و هاووڵاتییان دروست دەبێت، بەگوتەی هاووڵاتیان ئەو هێزە سەر بە حەشدی شەعبین و هێرشیان کردووەتە سەر دانیشتووانی ناوچەکە بە مەبەستی دەستبەسەرداگرتنی زەوییە کشتوکاڵییەکانیان.

 

چیرۆکی سەرەکی: گرتە ڤیدیۆیەک لە تۆڕە کۆمەڵاتییەکان  بڵاوبووەتەوە، تێیدا هێزێکی چەکدار هێرش دەکەنە سەر هاووڵاتیانی ناوچەی جادرییەی شاری بەغدا و گرژی و ئاڵۆزی لەنێوانیاندا دروست دەبێت.

 

لێدوانی فەرمی: بەپێی لێدوانی ئەو هاووڵاتییانەی کە گرتە ڤیدیۆکەیان بڵاو کردووەتەوە، چەند کەسایەتییەکی دەستڕۆیشتووی سەر بەهێزەکانی حەشدی شەعبی هەوڵی داگیرکردنی ئەو زەوییانە دەدەن کە دەکەوێتە نزیک "یانەی فڕووسییەوە" لە جادرییە، ئەو ناوچەیە بە یەکێک لە گرانبەهاترین ناوچەکانی بەغدا دادەنرێت و بەهۆی گرنگییەکەیەوە نرخی هەر مەترێک زەوی تێیدا 5000 دۆلاری تێپەڕاندووە.

 

زانیاریی زیاتر: خاوەن زەوییە کشتوکاڵییەکانی ناوچەکە جەخت لەوە دەکەنەوە کە ئەوان خاوەنی ڕاستەقینەی زەوییەکانن، بەپێی یاسای چاکسازیی کشتوکاڵی "ئیسڵاح زراعی"، لە ساڵی 1955ـەوە خاوەندارێتی ئەم زەوییانە بۆ ئەوان دەگەڕێتەوە، بەڵام ئێستا لەلایەن کەسانی دەستڕۆیشتووەوە هەوڵی زۆرەملێ دەدرێت بۆ دەرکردنیان و دەستبەسەرداگرتنی موڵکەکانیان.