مالیکی: ناکۆکییەکانی نێوان هەولێر و بەغدا بە ڕێککەوتنی کاتی چارەسەر ناکرێن

ئاڤا نیوز

سەرۆکی هاوپەیمانیی دەوڵەتی یاسا ڕایدەگەیێنێت، کێشەکانی نێوان هەرێمی کوردستان و بەغدا بە ڕێککەوتنی کاتی چارەسەر ناکرێن، بەڵکو پێویستییان بە یاسادانان و یاسای هەمیشەیی هەیە. مالیکی ئاماژە بەوەش دەکات کە یاسای هەڵبژاردنی عێراق "نادادپەروەریی" زۆری تێدایە و خاڵە لاوازەکانی پەیوەستن بە کۆتای ئافرەتان و پێکهاتەکان.

لێدوانی ڕۆژنامەوانی: نووری مالیکی، سەرۆکی هاوپەیمانیی دەوڵەتی یاسا لە چاوپێکەوتنێکی تەلەڤزیۆنیدا لەگەڵ کەناڵی "شەمس"، ڕایگەیاند، " کورد بەهۆی ڕەفتارەکانی ڕژێمی بەعسەوە قوربانی زۆریان داوە" ئەوەش دەڵێت: ناکۆکییەکانی نێوان هەرێمی کوردستان و حکومەتی فیدراڵ بە ڕێککەوتنە کاتییەکان چارەسەر ناکرێن، بەڵکو دەبێت لە ڕێگەی دەرکردنی یاساکانەوە بێت.

مالیکی گوتیشی: لەگەڵ سەرۆک بارزانی زۆرجار لەڕێگەی تەلەفۆنەوە قسەمان کردووە، بەڵام ئەو دۆخەی ئێستا تێیداین و ئەو ئەرکەی لەسەرمان جێبەجێی بکەین لە پرۆسەی سیاسی لە دوای هەڵبژاردن، پێویستی بە دیالۆگی ڕاستەوخۆ هەیە، هەر بۆیەش سەردانی دەکەم بۆ چارەسەرکردنی ئەو کێشانەی هەن.

لەلایەکی دیکەوە: مالیکی ئاماژەی بەوەشدا "یاسای هەڵبژاردنی عێراقی نادادپەروەری زۆری تێدایە و دیارترین خاڵەکانی لاوازیی یاساکە پەیوەستن بە کۆتاکان". ئەمەش لە کاتێکدایە کە داواکارییەکی بەرفراوان هەیە بۆ "پێداچوونەوە بە یاساکە پاش ئەنجامەکانی ئێستا".

لەهەمان کاتدا: نووری مالیکی، سەرۆکی هاوپەیمانیی دەوڵەتی یاسا جەختی لەسەر پشتیوانیکردنی پێکهێنانی حکومەت کردەوە لە ماوەی یەک مانگدا پاش ڕاگەیاندنی ئەنجامەکان و داوای لە کورد و سوننە کرد پەلە بکەن لە دیاریکردنی پۆستەکانیان.

لەبارەی حکومەتی داهاتووش، مالیکی دووپاتیکردەوە "سەرۆکوەزیرانی داهاتوو ڕووبەڕووی کێشەی گەورە دەبێتەوە، دیارترینیان قەیرانی داراییە." ئاماژەشی بەوەدا کە "چوارچێوەی هەماهەنگی تایبەتمەندی دیاریکراوی بۆ کەسایەتی سەرۆکوەزیران داناوە،" هاوکات ڕەتیشیکردەوە بڕیارێک لەنێو چوارچێوەی هەماهەنگی هەبێت " بۆ ئەوەی سوودانی لە پۆستی سەرۆکایەتی حکومەت" بێبەش بکات.

لەسەر ئاستی نیشتمانیش، مالیکی ڕایگەیاند "عێراق سەقامگیر نابێت مەگەر بە سەقامگیریی هەموو ناوچەکانی." دووپاتیشیکردەوە: "پێموانییە سوننە لە عێراق پەراوێزخرابن و ئەوانەی ئەم بیرۆکەیە بڵاودەکەنەوە کەسانی دۆڕاون."