هاوپەیمانێتیەکەی سوودانی هەڵوێستی خۆی لەسەر کاندیدکردنی مالیکی ڕادەگەیێنێت

ئاڤا نیوز

ئەندامێکی هاوپەیمانی ئاوەدانکردنەوە و گەشەپێدان ڕایدەگەیێنێت، ڤیتۆمان لەسەر هیچ ناوێک نییە کە بۆ پۆستی سەرۆکوەزیران کاندید کرابێت، لەوانەش نووری مالیکی، ئەمینداری گشتیی حیزبی دەعوە.

چیرۆکی سەرەکی: ڕۆژی شەممە، حیزبی دەعوەی ئیسلامی بە کۆی دەنگی ئەندامانی ئەنجوومەنی شورای حیزبەکە، بڕیاریدا نووری مالیکی، ئەمینداری گشتیی حیزبەکە بۆ پۆستی سەرۆکوەزیران کاندید بکات.

لێدوانی فەرمی: عەلی فەتلاوی، ئەندامی هاوپەیمانی ئاوەدانکردنەوە و گەشەپێدان لە لێدوانێکدا بۆ میدیای عێراق دووپاتیکردەوە، چوارچێوەی هەماهەنگی یەکگرتووە و سیستەمێکی هەیە بۆ بەڕێوەبردنی دۆسییەکان و مامەڵەکردن لەگەڵ هەموو هێزە سیاسییەکاندا. هاوپەیمانی ئاوەدانکردنەوە و گەشەپێدان بە بەشێک لە چوارچێوەکە دادەنرێت.

زانیاریی زیاتر: بەگوتەی فەتلاوی "حکومەتی داهاتوو خێراترین دەبێت لە ڕووی پێکهێنانەوە لە چوارچێوەی وادە دەستوورییەکاندا". وتیشی "کورسییەکانی هاوپەیمانی ئاوەدانکردنەوە و گەشەپێدان بە زیادبوونی 3 بۆ 4 پەرلەمانتاری نوێ بەرز دەبنەوە".

ئەوەی ئێستا ڕوودەدات: نووری مالیکی لە هەولێرە بۆ تاوتوێکردنی دۆسییەکانی پێکهێنانی حکومەتی داهاتوو، هەروەها باسی دۆسییەکانی سەرۆکایەتی کۆمار و سەرۆکایەتی پەرلەمانی داهاتووش دەکرێت.