زیاتر لە 30%ـی کارەکانی دووسایدی هەولێر – کۆیە تەواو بووە

ئاڤا نیوز

15 کیلۆمەتری پرۆژەی دووسایدی نێوان هەولێر – کۆیە لە قۆناغی قیڕتاوکردندایە و زیاتر لە 30%ـی کارەکانی پرۆژەکەش تەواو بووە.

چیرۆکی سەرەکی: ڕۆژی 8-11-2025 دەست کرا بە قیڕتاوکردنی قۆناغی یەکەمی ڕێگای دووسایدی نێوان هەولێر – کۆیە کە 15 کیلۆمەتر لەخۆدەگرێت. بەتەواوبوونی ڕێگاکە مەترسی ڕووداوەکانی هاتووچۆ کەم دەبێتەوە و شۆفێران بە کەمتر لە نیو کاتژمێر دەتوانن لە هەولێرەوە بگەنە کۆیە.

لێدوانی فەرمی: کەیفی فارس، بەڕێوەبەری جێبەجێکاری پرۆژەی دووسایدی هەولێر ـ کۆیە بە ئاڤای ڕاگەیاند: زیاتر لە 30%ـی کارەکانی پرۆژەی دووسایدی نێوان هەولێر – کۆیە تەواو بووە، پرۆژەکە بە ستانداردێکی جیهانی دروست دەکرێت، لە قۆناغی یەکەم 15 کیلۆمەتر لە قیڕتاوکردندایە. درێژیی ڕێگاکە 37 کیلۆمەترە و هەر سایدێکی سێ ڕێڕەوە بە پانیی 12 مەتر، بە سێ چینی 22 سانتیمەتری قیڕ دەکرێت، تەواوی ڕێگاکە بە دەستی کاری ناوخۆیی کاری تێدا دەکرێت، بڕیار وایە پێش وادەی دیاریکراو تەواو بکرێت.

زانیاریی زیاتر: دووسایدی هەولێر – کۆیە پێکدێت لە شەش بەرزە پرد، پێنج ژێرپرد، پردێکی گەورەی 250 مەتر. بەتەواوبوونی، ڕێگای نێوان هەولێر - کۆیە لە یەک سایدی پڕ مەترسییەوە دەگۆڕێت بۆ ڕێگایەکی دووسایدی خێرا و مەترسیی ڕووداوەکانی هاتووچۆ کەم دەبێتەوە، هاوكات دووریی نێوان هەولێر - کۆیە لە كاتژمێرێكەوە دەبێت بە نیو كاتژمێر.

باکگراوند: ماوەی 14 ساڵە بەردی بناغەی پرۆژەی بە دووسایدکردنی ڕێگای نێوان هەولێر - کۆیە دانراوە، بەڵام نەتوانرا تەواو بکرێت، دواتر بە بڕیاری سەرۆکوەزیران مەسرور بارزانی پرۆژەکە دەستی پێکردەوە و ئێستا پڕۆژەكە زۆر بە خێرایی جێبەجێ دەكرێت.