کچێک لە باڵەکایەتی دەبێتە سەرمەشقی کەرتی گەشتیاری

ئاڤا نیوز

لە دەڤەری باڵەکایەتی، کچە دەرچوویەکی زانکۆ بەبێ ئەوەی چاوەڕوانی دامەزراندنی حکومی یان کارکردن لە کەرتی تایبەت بکات، داهێنانێکی نوێ لە بواری گەشتیاریدا دەکات. ئەستێرە غازی، بە پشتیوانیی خێزانەکەی کۆمەڵگەیەکی گەشتیاریی کولتووری لە چۆمان دادەمەزرێنێت.

چیرۆکی سەرەکی: ساڵی 2022، لەناو سرووشتی قەزای چۆمان کە بە ئاو و هەواکەی لە چوار وەرزدا بەناوبانگە، ئەستێرە غازی دەستی بە جێبەجێکردنی بیرۆکەیەکی جیاواز کرد. ئەو بەپێچەوانەی شەپۆلی باوی گەشتیاری، گەڕایەوە بۆ ڕەسەنایەتی و بە شێوازی تەلارسازیی کۆن، چەند خانووێکی بە قوڕ، خشت و بەرد دروستکرد.

پڕۆژەکە تەنیا لە دیواری دەرەوەدا کۆن نییە، بەڵکو لە ناوەوەشدا هەموو کەرەستەکان کوردەوارین، بۆ نموونە سەماوەرێکی تێدایە کە تەمەنی 50 ساڵە. ئەستێرە سەرەتا بە دروستکردنی یەک خانوو دەستی پێکرد، بەڵام بەهۆی زۆری خواست لەسەری، پڕۆژەکەی فراوانتر کردووە بۆ سێ خانوو، ئێستاش پلانی هەیە ژمارەکەیان زیاتر بکات.

ئەوەی لەبارەیەوە دەگوترێت: بەپێی قسەی بەرپرسانی ناوچەکە و چاودێرانی کەرتی گەشتیاری لە سنوورەکە،  ئەستێرە بووەتە سیمبولێکی جوانی گەشتیاری و کاریگەرییەکی زۆری هەبووە لەسەر ڕاکێشانی گەشتیاران بۆ ناوچەکە و گۆڕینی تێڕوانین بۆ بیناسازیی گەشتیاری.

ئەم خانمە گەنجە خۆی سەرپەرشتی بەبازاڕکردنی پڕۆژەکەی دەکات، لە تۆڕە کۆمەڵایەتییەکان بە جلی کوردییەوە دەردەکەوێت و بانگەشە بۆ گەشتیاریی ناوچەکە دەکات، ئەمەش سەرنجی گەشتیارانی لە هەموو کوردستان، عێراق و تەنانەت بیانییەکانیشی بۆ لای خۆی ڕاکێشاوە.

سەرکەوتنی پڕۆژەکەی ئەستێرە تەنیا بۆ خۆی نەبووە، بەڵکو بووەتە سەرچاوەی ئیلهام بۆ خەڵکی ناوچەکە. ئێستا لە چۆمان و دەوروبەری، کاتێک خەڵک پڕۆژەی گەشتیاری دروست دەکەن، لاسایی ئەستێرە دەکەنەوە و ڕوو لە دروستکردنی "خانووی کولتووری" دەکەن. ئەم پڕۆژەیە جگە لە دابینکردنی داهات بۆ خێزانەکەی، هەلی کاریشی بۆ چەندین گەنجی ناوچەکە ڕەخساندووە.