بە ئامادەبوونی سەرۆکوەزیرانی کوردستان ئاهەنگی خولی 44ـەمینی زانکۆی سەڵاحەددین بەڕێوە دەچێت

ئاڤا نیوز

بڕیارە کاتژمێر 4ـی ئەمڕۆ ئێوارە بە ئامادەبوونی مەسرور بارزانی، سەرۆکوەزیرانی کوردستان لە یاریگای فرەنسۆ هەریری، زانکۆی سەڵاحەددین، ئاهەنگی بەخشینی بڕوانامە بۆ دەرچووان بەڕێوە ببات.

وێنە گەورەکە: زانکۆی سەڵاحەددین، لە ڕووی دامەزراندنەوە بە یەکەم زانکۆی باشووری کوردستان دادەنرێت، ساڵی 1968 لە سلێمانی دامەزرا، بەڵام ڕژێمی بەعس لە ساڵی 1981 ئەم زانکۆیەی گواستەوە هەولێر.

لێدوانی فەرمی: سامان عەبدوڵڵا، بەڕێوەبەری ڕاگەیاندنی زانکۆی سەڵاحەددین بە ئاڤای وت، ئاهەنگی دەرچوونی ئەمساڵ جیاوازترە لە ساڵانی ڕابردوو، چونکە ئەمساڵ جگە لەوانەی دەرچوون و لە بەشە جیاوازەکانی ئەم زانکۆیە بڕوانامەیان پێ دەبەخشرێت، هاوکات دەرچوانی پێنج ساڵی خوێندنی ماستەر و دکتۆراش بڕوانامەیان پێ دەبەخشرێت.

ژمارەکان وادەڵێن: ئەمساڵ پێنج هەزار و 32 دەرچووی ساڵی خوێندنی 2024 بۆ 2025 بڕوانامەی دەرچوون وەردەگرن. لەگەڵ ئەوانیشدا هەزار و 950 دەرچووی خوێندنی ماستەر و دکتۆرا کە لە ساڵانی 2020 بۆ 2025 دەرچوون، بەشداری لەم ئاهەنگە دەکەن.

ئەمەش بزانە: ئێستا زانکۆی سەڵاحەددین لە 17 کۆلێژ و 90 بەشی ئەکادیمی پێکدێت.