کۆمیسیۆن ڕاپۆرتی خۆی لەبارەی تانەکانی هەڵبژاردن ئامادە دەکات

ئاڤا نیوز

دوای ئەوەی پێنجشەممەی ڕابردوو وادەی تانەدان لە ئەنجامی کۆتایی هەڵبژاردنی پەرلەمانی عێراق کۆتاییهات و 872 تانە لە ئەنجامەکان دران، ئێستا کۆمیسیۆن دەستیکردووە بە ئامادەکردنی ڕاپۆرتی خۆی لەبارەی تانەکان و بۆ دەستەی دادوەریی هەڵبژاردنەکانی دەنێرێت.

وێنە گەورەکە: 17ـی ئەم مانگە کۆمیسیۆن ئەنجامی کۆتایی هەڵبژاردنی پەرلەمانی عێراق و کورسی سەرجەم لایەنەکانی ڕاگەیاند، 18 تا 20ی ئەم مانگەش وەک ماوەی تانەدان دیاریکرابوو، حەوت ڕۆژیش لەبەردەم کۆمیسیۆنە تا وەڵامی تانەکان بداتەوە و بۆ دەستەی دادوەریی هەڵبژاردنەکانی دەنێرێت.

لێدوانی فەرمی: نبراس ئەبو سوودە، یاریدەدەری وتەبێژی کۆمیسیۆنی هەڵبژاردنەکانی عێراق بە ڕۆژنامەی سەباحی ڕاگەیاندووە، وەک کۆتا ئامار کۆمیسیۆن 872 تانەی لەسەر ئەنجامی کۆتایی هەڵبژاردنەکان وەرگرتووە و ئێستا دەستکراوە بە ئامادەکردنی ڕاپۆرت لەسەر تانەکان.

وتیشی، کۆمیسیۆن لە حەوت ڕۆژدا ڕاپۆرتی خۆی لەسەر سەرجەم تانەکان ئامادە دەکات و بۆ دەستەی دادوەریی هەڵبژاردنەکان بەرزییان دەکاتەوە، دەستەکەش لە 10 ڕۆژدا بڕیاری خۆی لەبارەیانەوە دەدات، دواتریش ئەنجامەکان بۆ دادگای فیدڕاڵی بەرزدەکرێنەوە بەمەبەستی پەسەندکردنیان.