دەستپاکی عێراق: زیاتر لە نۆ هەزار سزادراو و تۆمەتبار بە گەندەڵی، لێبووردنی گشتیی دەیانگرێتەوە

ئاڤا نیوز

دەستەی دەستپاکی عێراق ڕایگەیاندووە، نۆ هەزار و 275 کەس پەیوەست بە دۆسییەکانی گەندەڵی و بەهەدەردانی ماڵی گشتی، یاسای لێبووردنی گشتی دەیانگرێتەوە و تائێستاش بەهۆی ئەم یاسایەوە ملیارێک و 597 ملیۆن دینار بۆ خەزێنەی دەوڵەت گەڕێنراوەتەوە.

وێنە گەورەکە: سەرەتای ئەمساڵ پەرلەمانی عێراق یاسای لێبووردنی گشتی پەسەندکرد، بەگوێرەی بڕگەیەکی یاساکەش هەر کەسێک پارەی گشتی بردبێت و گەندەڵی ئەنجامدابێت، ئەگەر پارەکە بگەڕێنێتەوە لە بەرامبەردا لێبووردنی گشتی دەیگرێتەوە و ئازاد دەکرێت.

ڕاگەیێنراوی فەرمی: دەستەی دەستپاکی عێراق ڕاپۆرتی نیوەی یەکەمی ئەمساڵی بڵاوکردەوە و ئاماژەی بەوەشداوە، نۆ هەزار و 275 کەس کە بەگوێرەی ڕاپۆرتەکانی دەستەکەیان گەندەڵییان لەسەر ئاشکرابووە و بەشێکیان سزایان بەسەردا سەپێنراوە، ئێستا بەر یاسای لێبووردنی گشتی کەوتوون و لە قۆناغی یەکەمیشدا بەهۆی جێبەجێکردنی یاساکەوە، ملیارێک و 597 ملیۆن دینار پارە بۆ خەزێنەی دەوڵەت گەڕێنراوەتەوە.

ئەوەشی خستووەتەڕوو، هەزار و 170 سزادراو و هەشت هەزار و 105 تۆمەتبار کە هەموویان پێکەوە زیاتر لە 22 هەزار دۆسیەیان لەسەرە، لێبووردنی گشتی دەیانگرێتەوە.