ئەمساڵ یادی 156 بە قەزابوونی هەڵەبجە جیاواز دەبێت

ئاڤا نیوز

ڕۆژی دووشەممە، 156 ساڵ بەسەر بە قەزا بوونی هەڵەبجە تێپەڕ دەبێت، بڕیارە لە ماوەی دوو ڕۆژدا یادی ڕۆژی هەڵەبجە بە چەندین چالاکی جۆراوجۆر ئەنجام بدرێت.

چیرۆکی سەرەکی: بەگوێرەی سەرچاوە مێژووییەکان ڕۆژی 24ـی 11ـی ساڵی 1869 لە سەردەمی دەسەڵاتی عوسمانییەکان یەکەم قایمقامی هەڵەبجە دەستبەکار بووە. دیاریکردنی ڕۆژی هەڵەبجە دەگەڕێتەوە بۆ ساڵی 2023 کاتێک پارێزگای هەڵەبجە بە فەرمانێک بڕیاریدا هەموو ساڵێک ئەو ڕۆژە بکرێتە "یادی ڕۆژی هەڵەبجە".

لێدوانی فەرمی: نوخشە ناسیح، پارێزگاری هەڵەبجە بە ئاڤا میدیای ڕاگەیاند، بۆ ئەمساڵ بڕیارمانداوە یادی ڕۆژی هەڵەبجە بەناوی " ئاوڕێک لە ڕابردوو دیدگایەک بۆ داهاتوو" بێ و بۆ ماوەی دوو ڕۆژ چالاکی جۆراجۆر لە قوتابخانە و زانکۆکان بکەین. ڕۆژی سێشەممە هەڵمەتێکی نەمام چاندنمان دەبێت.

بەپێی خشتەی ئەو بەرنامەیەی پارێزگای هەڵەبجە بە ئاڤای داوە، لە چالاکی ئەم دوو ڕۆژە جگە لە پێشانگای شێوەکاری و نمایش شانۆگەری و کۆنسێرتی مۆسیقا و ئەنجامدانی ماراسۆن، هاوکات نمایشی چەند تابلۆیەکی هونەریی لە هەڵپەڕکێی کوردی و ناوچەیی لەلایەن تیپی میللی هەڵپەڕکێی سلێمانی پێشکەش دەکرێت. 

ئەمەش بزانە: بڕیارە سبەی دووشەممە کاتژمێر 3ـی پاش نیوەڕۆ هەر بۆ یادی ڕۆژی هەڵەبجە، بەهاوکاری تیپی مۆسیقای شنروێ، کۆنسێرتێک بۆ هونەرمەند هۆشیار حەمە فەرەج بکرێت.