یەکەی 70 دەخرێتە سەر وەزارەتی پێشمەرگە

ئاڤا نیوز


لە چوارچێوەی یەکخستنەوەی هێزەکانی پێشمەرگە؛ کار لەسەر تەواوکردنی مامەڵە یاساییەکانی یەکەی 70 دەکرێت لەو چوارچێوەیەش "فەرماندەیی دەڤەر" دەخرێتە سەر وەزارەتی پێشمەرگە، لە ئایندەیەکی نزیکدا مامەڵەی گواستنەوەیان تەواو دەبێت.

چیرۆکی سەرەکی: کۆتایی ساڵی ڕابردوو وەزیری پێشمەرگە و ئەمینداری گشتیی هێزەکانی پێشمەرگە و سەرۆک ئەرکان لەگەڵ فەرماندەی یەکەکانی 70 و 80 کۆبوونەوە، لەبارەی یەکخستنەوەی هێزەکانی پێشمەرگە و بەرنامە و پلانەکانەوە گفتوگۆیان کرد، لەسەر ئەوە ڕێککەوتن کە دوو فەرماندەیی دەڤەر لەژێر سێبەری وەزارەتی پێشمەرگە پێکبهێنرێت و هەردوو یەکەکە لەو چوارچێوەیە یەکبخرێت، ئێستا یەکەی 80 لە چوارچێوەی فەرماندەی دەڤەر یەک خراونەتە سەر وەزارەتی پێشمەرگە.

لێدوانی فەرمی: سەرچاوەیەک لە فەرماندەیی یەکەی 70 بە ئاڤای گوت، "مامەڵەی دروستکردنی پێکهاتەی فیرقەکان و دیاریکردنی دەسەڵاتەکان دەستیپێکردووە، پێش کۆتایی ئەمساڵ مامەڵەکان تەواو دەبن و لەچوارچێوەی فەرماندەیی دەڤەر دوو دێنە ژێر چەتری وەزارەتی پێشمەرگە."

ئەمەش بزانە: ئەم پرۆسەیە چەندین سوودی هەیە، یەکێکیان زیادکردنی مووچە و ئیمتیازاتی پێشمەرگەیە، بۆ قۆناغی ئێستا دەرماڵەکانیان بۆ نابەسترێت و دوادەکەوێت، دوای پەسەندکردنی بودجەی ساڵی 2026، ئەوکات هەر دەرماڵەیەک بە پێشمەرگەی سەر بە وەزارەت بدرێت ئەوانیش دەگرێتەوە.