کونسولی نوێی ئیمارات بۆ سەرۆک بارزانی: وڵاتەکەمان خوازیاری پەرەپێدانی پەیوەندییە ئابوورییەکانە لەگەڵ هەرێمی کوردستان

ئاڤا نیوز

سەرۆک بارزانی لە پیرمام پێشوازی لە کونسوڵی گشتیی نوێی ئیمارات لە هەرێمی کوردستان کرد. کونسوڵی ئیمارات خواستی وڵاتەکەی بۆ پەردان بە پەیوەندییە ئابوورییەکانی نێوان وڵاتەکەی و هەرێمی کوردستان دوپات کردووەتەوە.

ڕاگەیێنراوی فەرمی: بارەگای بارزانی ڕایگەیاند، ئەمڕۆ یەکشەممە، سەرۆک مەسعود بارزانی پێشوازی کردووە لە ئەحمەد حەسەن ئەلشەحی، کونسوڵی گشتی نوێی ئیمارات. لە دیدارەکە کونسوڵ سڵاوی سەرکردایەتیی ئیماراتی بە سەرۆک بارزانی گەیاندووە و پیرۆزبایی سەرکەوتنی پرۆسەی هەڵبژاردنی لێ کردووە.

لە ڕاگەیێنراوەکەی بارەگای بارزانی ئەوەش هاتووە، کونسوڵی گشتیی ئیمارات ستایشی پێشکەوتن و بوژانەوەی هەرێمی کوردستانی کردووە و وتویەتی، وڵاتەکەی خوازیارە پەیوەندییەکانی لە بوارەکانی ئابووری، بازرگانی، تەکنەلۆژیای زانیاری و کشتوکاڵ و بوارەکانی تر لەگەڵ هەرێمی کوردستان پەرەپێبدات.

سەرۆک بارزانی وێڕای بە گەرمی بەخێرهاتنی کونسوڵی نوێ وتوویەتی، گەلی کوردستان هەمیشە ڕوانگەیەکی ئیجابی و دۆستانەیان بەرانبەر بە ئیمارات هەیە و پێشوازی لە بەردەوامی و پەرەپێدانی پەیوەندییەکانی نێوان هەردوولا دەکەین.