لە میسان تەرمی شێخێک بە تەقەکردنەوە دەنێژرێت

ئاڤا نیوز

لە پارێزگای میسانی عێراق، مەراسیمی بەخاکسپاردنی شێخێک لە ساتێکی ماتەمینییەوە دەگۆڕێت بۆ نمایشێکی سەربازیی ترسناک. بەکارهێنانی چەکی قورسی وەک "ئار بی جی و بیکەیسی" لە مەراسیمەکەدا، بووەتە جێگەی ڕەخنەی تووندی خەڵک و بە نیشانەی لاوازیی هەیبەتی دەوڵەت وەسف دەکرێت.

ببینە و ببیستە: گرتەیەکی ڤیدیۆیی کە لە تۆڕە کۆمەڵایەتییەکاندا بە خێرایی بڵاوبووەتەوە، دیمەنی مەراسیمی ناشتنی شێخێکی عەشایەر لە یەکێک لە قەزاکانی پارێزگای میسان نیشان دەدات. لە ڤیدیۆکەدا دەردەکەوێت کە ژمارەیەکی زۆر چەکدار ئامادەن و لەبری فرمێسک و بێدەنگی، بە تەقەکردنی چڕ و هەڕەمەکی بەڕێی دەکەن.

ئەوەی دیمەنەکەی نامۆ و ترسناک کردووە، تەنیا بەکارهێنانی چەکی سووک نییە، بەڵکو چەکی قورسی وەک "ئار بی جی و بیکەیسی" بەکاردەهێنرێت و بە ئاسماندا تەقە دەکرێت. ئەم نمایشە کە بە پاساوی "ڕێزگرتن" لە کۆچکردوو ئەنجام دەدرێت، مەراسیمەکەی لە دۆخێکی تراژیدییەوە کردووەتە دۆخێکی تێکەڵ بە گاڵتەجاڕی و ترس.

کاردانەوەکان: ئەم ڕووداوە شەپۆلێک لە ناڕەزایەتی و ڕەخنەی لە ناوەندە جیاوازەکاندا دروستکردووە. چاودێران و چالاکوانانی مەدەنی هۆشداری دەدەن لە مەترسیی ئەم دیاردەیە.

دەڵێن، "ئەم دیمەنانە بەڵگەی ڕوونن لەسەر نەبوونی دەسەڵاتی یاسا و هەیبەتی دەوڵەت. چەک کە دەبێت تەنیا ئامرازێک بێت بە دەستی هێزە ئەمنییەکانەوە بۆ پاراستنی خەڵک، ئێستا بووەتە کەرەستەی دەربڕینی خەم و خۆشی، ئەمەش هەڕەشەیەکی ڕاستەوخۆیە بۆ سەر ئاسایشی کۆمەڵگە."