ترەمپ: ئیخوان موسلیمین دەخەینە لیستی تیرۆر

ئاڤا نیوز

ئەمریکا دەیەوێت کۆمەڵەی ئیخوان موسلمین بخاتە لیستی تیرۆری وڵاتەکەی، ترەمپیش دەڵێت، بە تووندی سزا بەسەر ئەو کۆمەڵەیەدا دەسەپێنن.

وێنە گەورەکە: کۆمارییەکانی ئەمریکا لە کۆنگرێس و پیران، بە پاڵپشتی ژمارەیەک لە دیموکراتەکان، ماوەیەکە گوشار لە وەزارەتی دەرەوەی ئەمریکا دەکەن بۆ ئەوەی گرووپی ئیخوان موسلمین بخاتە لیستی تیرۆرەوە.

لێدوانی فەرمی: دۆناڵد ترەمپ، سەرۆکی ئەمریکا لە لێدوانێکدا بۆ میدیای (Just the News) ڕایگەیاند، بەنیازە کۆمەڵەی "ئیخوان موسلیمین" وەک ڕێکخراوێکی تیرۆریستی بیانی بناسێنێت، ئەم کارە بە بەهێزترین و تووندترین شێوە ئەنجام دەدرێت و لە ئێستادا دۆکیۆمێنت و بەڵگەنامە کۆتاییەکان بۆ ئەو مەبەستە ئامادە دەکرێن.

لەلایەکی دیکەوە: مارکۆ ڕوبیۆ، وەزیری دەرەوەی ئەمریکا، لە مانگی هەشتدا ئاماژەی بەوە کردبوو، پۆلێنکردنی ئیخوان موسلمین وەک ڕێکخراوێکی تیرۆریستی لە ئارادایە، بەڵام پرۆسەیەکی ورد و درێژخایەنە، چونکە گرووپەکە خاوەنی چەندین لق و لایەنی پەیوەندیدارە کە دەبێت بە جیا لێکۆڵینەوەیان تێدا بکرێت.

ئەوەی پێویستە بیزانیت: پێشتر ژمارەیەک لە وڵاتانی ڕۆژهەڵاتی ناوەڕاست ڕێوشوێنیان دژی ئەم گرووپە گرتووەتە بەر، لەوانەش میسر و ئوردن گرووپەکەیان قەدەغە کردووە، هاوکات سعوودیە، ئیمارات و بەحرەین وەک ڕێکخراوێکی تیرۆریستی پۆلێنیان کردووە.

باکگراوند: ئیخوان موسلیمین لە ساڵی 1928 لەلایەن "حەسەن بەننا"ـەوە لە میسر دامەزراوە بە ئامانجی دامەزراندنی دەوڵەتێکی ئیسلامی و پەیڕەوکردنی شەریعەت. هەروەها سەید قوتب، کە یەکێک بوو لە بیرمەند و سەرکردە دیارەکانی ئەو گرووپە لە ناوەڕاستی سەدەی رابردوودا، بەوە ناسراوە کە بانگەشەی بۆ جیهاد کردووە و بیرۆکەکانی بە ئیلهامبەخشی جیهادییە مۆدێرنەکانی وەک ئوسامە بن لادن و ئەیمەن زەواهیری دادەنرێن.