هاوپەیمانی دەوڵەتی یاسا: گفتوگۆ لەسەر کاندیدکردنی زێباری بۆ پۆستی سەرۆککۆمار دەکەین

ئاڤا نیوز

ئەندامێکی هاوپەیمانی دەوڵەتی یاسا ڕایدەگەیێنێت، ئەگەر پارتی دیموکراتی کوردستان هۆشیار زێباری بۆ پۆستی سەرۆککۆمار پێشنیاز بکات، ئەوا گفتوگۆی لەسەر دەکەن. دووپاتیدەکاتەوە کە چوارچێوەی هەماهەنگی لەسەر هێڵە گشتییەکان ڕێککەوتووە و پێکهاتەکانیش بەرپرسیارن لە گفتوگۆکردن لەسەر پۆستەکانیان.

وێنە گەورەکە: بەپێی نەریتێکی سیاسی لە دوای ساڵی 2005 ـەوە، پۆستی سەرۆککۆماری عێراق پشکی کورد بووە، سەرۆکوەزیران بۆ شیعە و سەرۆکی پەرلەمانیش بۆ سووننە بووە.

لێدوانی ڕۆژنامەوانی: عەلا ئەلحەدادی، ئەندامی هاوپەیمانی دەوڵەتی یاسا لە چاوپێکەوتنێکی تەلەڤزیۆنیدا ڕایگەیاند، "ئەگەر پارتی هۆشیار زێباری وەک کاندید بۆ پۆستی سەرۆککۆمار پێشکەش بکات، ئەوا دەخرێتە بەر گفتوگۆ"، ئاماژەی بەوەشکرد کە "چوارچێوەی هەماهەنگی کۆمەڵێک تەحەدی دیاریکردووە کە دەخرێنە بەردەم کاندیدی سەرۆکوەزیرانی داهاتوو بۆ چارەسەرکردنیان".

لەلایەکی دیکەوە: ئەندامەکەی هاوپەیمانی دەوڵەتی یاسا "ئەزموونی چوارچێوەی هەماهەنگی"ـی بە "یەکێک لە باشترین بەرهەمەکانی دوای 2003" ناو برد و وتی: "چوارچێوەی هەماهەنگی لە دۆخێکی تەبایی و سەقامگیریی ناوخۆییدا دەژی". هاوکات ئاماژەی بەوەدا کە فەرماندەی گشتی ناتوانێت بە تەنیا کار بکات بەبێ پاڵپشتی سیاسی و لیژنەی چاوپێکەوتنی بەربژێرەکان کاری خۆی دەخاتە بەردەم گەورەکانی چوارچێوەکە.

بەتەنیشت ئەو بابەتەوە: ئەلحەدادی ڕوونیکردەوە، کە "چوارچێوەی هەماهەنگی پێی باش نییە کەسایەتییەکی سەربازی بۆ سەرۆکایەتیی وەزیران کاندید بکرێت" و وتی: "ئەمجارە هیچ ناوێک بۆ سووتاندن نییە و هەموو ناوە پێشکەشکراوەکان دەرفەتی ڕاستەقینەیان دەبێت". ئەوەشی خستەڕوو "کوتلە سیاسییەکان کاندیدەکانی خۆیان بە فەرمی پێشکەش نەکردووە، جگە لە سوودانی و مالیکی"، وتیشی: "مالیکی بەتواناترین کەس دەبێت بۆ سەرکردایەتیکردنی قۆناغی داهاتوو".