پێشانگەی پرۆسێسكردن و بە پاكەتكردنی بەرووبوومی کشتوکاڵی دەكرێتەوە

ئاڤا نیوز

لە هەولێر، هەشتەمین پێشانگەی نێودەوڵەتیی عێراق بۆ پرۆسێسكردن و بە پاكەتكردنی بەرووبوومی كشتوكاڵی و خۆراك دەكرێتەوە و چوار ڕۆژ بەردەوام دەبێت.

چیرۆكی سەرەكی: لە ڕۆژانی 24 تاوەكو 27ـی ئەم مانگە، پێشانگەی نێودەوڵەتیی هەولێر، باوەش بۆ پێشانگایەكی نموونەیی و جۆریی دەكاتەوە كە بە بەشداری دەیان كۆمپانیای بەرهەمهێنانی خۆراكی و لە قووتونانی هەرێمی كوردستان و پارێزگاكانی ناوەڕاست و باشووری عێراق و وڵاتانی ناوچەكە بەڕێوەدەچێت.

ئەمە هەشتەمین پێشانگەی نێودەوڵەتیی عێراقە بۆ پرۆسێسكردن، بەرهەمهێنان و بە پاكەتكردنی بەرووبوومی كشتوكاڵی و خۆراك (2025 Agro Pack& Food Iraq)،  

ئەوەی پێویستە بیزانیت: عێراق سێیەم گەورەترین هاوردەكاری تەكنەلۆژیای پرۆسێسكردن و بە پاكەتكردنی خۆراك و خواردنەوەكانە لە ڕۆژهەڵاتی ناوەڕاستدا، لەنێوان ساڵانی 2018 بۆ 2023، هاوردەی عێراق لە بواری پرۆسێسكردنی خۆراك و خواردنەوە و تەكنەلۆجیای بەستن، ساڵانە بەڕێژەی 21.8% گەشەی كردووە و بەهای هاوردەكردنی ئامێرە پێویستەكان بۆ برەودانی ئەو كەرتە، لە 89 ملیۆن یۆرۆوە بۆ 239 ملیۆن یۆرۆ بەرزبووەتەوە.

بۆچی گرنگە: هەردوو حكومەتی هەرێمی كوردستان و عێراق لەپێناو پشتگیریكردنی بەرهەمی ناوخۆیی و پەرەپێدانی دروستكراوی خۆماڵی، پلانێكی تۆكمەیان داڕشتووە و پیادەی دەكەن، پێشبینی دەكرێت لە ساڵانی داهاتوودا بەرهەمی گەشەسەندووی ئەو پلانە لە بواری پرۆسێسكردن و بەپاكەتكردنی بەرهەمی خۆراكی، بەهێزەوە بەدەربكەوێت، كە بەهۆیەوە دەرفەتی كاری زیاتر دەڕەخسێت و دەبێتە هۆی بەهێزكردنی ژێرخانی ئابووریی وڵات.

نووسراوی فەرمی: ڕێوڕەسمی كردنەوەی ڕۆژی یەكەمی پێشانگە لەكاتژمێر (12)ـی نیوەڕۆ بەڕێوەدەچێت و تاوەكو كاتژمێر 7:00 شەو كراوە دەبێت، ڕۆژانی دواتر لە كاتژمێر 11:00ـی پێشنیوەڕۆ دەكرێتەوە و بەهەمان شێوە تا كاتژمێر 7:00 بەردەوام دەبێت.