چارەنووسی حەشد لەسەر مێزی گفتوگۆی حیزبە عێراقییەکانە

ئاڤا نیوز

دوای هەڵبژاردنی پەرلەمانی عێراق چارەنووسی حەشدی شەعبی و گرووپە چەکدارەکانی نزیک لە ئێران بووەتە بابەتێکی سەرەکی لەسەر مێزی گفتوگۆی حیزبە شیعییەکان.

وێنە گەورەکە: گوشارەکان لەلایەن ئەمریکاوە لەسەر حکومەتی عێراق بەردەوامە بۆ نەهێشتنی گرووپە چەکدارەکانی نزیک لە ئێران لە عێراق، یان تێکەڵکردنیان لەناو سوپای عێراق.

بڵاوکراوەی فەرمی: بەگوێرەی هەواڵێکی ڕۆژنامەی "شەرقولئەوسەت" گفتوگۆکان لەسەر سێ پێشنیازی سەرەکی دەسووڕێنەوە: یەکخستنی حەشدی شەعبی لە دامەزراوەکانی دەوڵەت، کەمکردنەوەی ژمارەیان بۆ کۆنترۆڵکردنیان لە ڕووی دارایی و ئەمنییەوە، یان هەڵوەشاندنەوەی پەیوەندییە سیاسییەکانیان و خستنەسەر سەرکردایەتییەکی سەربازیی ناوەندی.

هۆکارە زانراوەکان: ناکۆکی نێوان گرووپەکان و سەرکردەکانیان، گەیشتن بە ڕێککەوتنی کۆتایی ئاڵۆزتر دەکات، هاوکات سەرچاوەکان ئاماژە بەوە دەکەن کە هەر هەنگاوێکی جێبەجێکردن پێویستی بە "گڵۆپی سەوز" هەیە لە تارانەوە، هێزە شیعەکان ئامادەن ئەم بابەتە بخەنە بەرنامەی نوێی حکومەتەوە.

باکگراوند: ڕۆژی 17ـی ئەیلوولی ئەمساڵ، وەزارەتی دەرەوەی ئەمریکا هەریەکە لە گرووپەکانی بزووتنەوەی نوجەبا، کەتائیبی سەییدی شوهەدا، بزووتنەوەی ئەنساروڵڵا ئەوفیا و کەتائیبی ئیمام عەلی خستە لیستی تیرۆرەوە.