لەماوەی دوو هەفتەدا خزمەتگوزارییەکی دیکە لە "KRD Pass" کارا دەکرێت

ئاڤا نیوز

سەرۆکی فەرمانگەی تەکنۆلۆجیای زانیاری دەڵێت، لەماوەی دوو هەفتەی داهاتوودا خزمەتگوزاری نیشاندانی سزای سەرپێچی هاتووچۆ بۆ بەکارهێنەرانی دوو پارێزگا لە ئەپڵیکەیشنی KRD Pass بەردەست دەبێت.

وێنە گەورەكە: فەرمانگەی تەکنۆلۆجیای زانیاری ئەپڵیکەیشنێکی بەناوی "KRD Pass" پەرەپێداوە. ئەپڵیکەیشنەکە وەک جزدانێکی ئەلیکترۆنی کاردەکات. ئەمەش لەپێناو کەمکردنەوەی ڕۆتینیات و گەڕانەوەی کات بۆ هاونیشتمانیان.

لێدوانی فەرمی: هیوا ئەفەندی، سەرۆکی فەرمانگەی تەکنەلۆجیای زانیاری بە ئاڤای ڕاگەیاند، لەم هەفتەیە بینینی سزای سەرپێچی شۆفێری لە ئەپڵیکەیشنەکە بۆ بەشداربووانی دهۆک بەردەست دەبێت و هەفتەی داهاتوو بۆ بەشداربووانی هەولێر کارا دەکرێت.

هیوا ئەفەندی دەشڵێت: تا کۆتایی ساڵ بەشداربووان دەتوانن پارەی کارەبا لەڕێگای ئەپڵیکەیشنی "KRD Pass" بدەن و بەردەوام ئەم پرۆسەیە لە پێشکەوتندایە.

بۆچی گرنگە: ئەپلیکەیشنی KRD pass، یەکێکە لە خزمەتگوزارییە گرنگەکان هەموو زانیارییەکانی بەکارهێنەر لەناو مۆبایلەکەی دەبێت، بۆ نمونە پێویست ناکات بەکارهێنەر ئەو هەموو ناسنامەیە هەڵبگرێت. هەر لەسەر ئەو ئەپڵیکەیشنە دەزانی مووچەی ئەم مانگەت چەندە، چەندی بنەڕەتییە، چەندت لێ بڕاوە و ئەو لێ بڕينە هی چییە.