بۆ ڕووبەڕووبونەوەی "هەواڵی ناڕاست" حکومەتی هەرێمی کوردستان ڕێکارێکی نوێ ڕادەگەیەنێت

ئاڤا نیوز

لە ئەمڕۆوە فەرمانگەی میدیا و زانیاری حکومەتی هەرێمی کوردستان داتا و زانیاری پێویست بۆ هەموو ئەو ڕۆژنامەنووسانە بەردەست دەخات کە لە بوارە جیاوازەکان پێویستیانە و چەناڵی "خزمەتی هەواڵ" بۆ ڕۆژنامەنووسان ڕادەگەیەنێت.

وێنە گەورەکە: لەسەر ئاستی جیهان و لە وڵاتانی دیموکراسی، حکومەت زانیاری پێویست بۆ ڕۆژنامەنووسان بەردەست دەخات، ئەمەش لەپێناو بەرگرتن لە هەواڵی ناڕاست و پێشخستنی شەفافیەت لە ڕێگای پێدانی زانیاری دروست و فەرمی.

لێدوانی فەرمی: هێما نیازی، بەڕێوەبەری سۆشیال میدیای فەرمانگەی میدیا و تەکنۆلۆجیای زانیاری بە ئاڤای گوت، چەناڵێکی پێشکەوتوومان دروستکردووە بە ناوی "خزمەتی هەواڵ" لەلایەن (کۆمپانیای مێتا) ڤێریفا یان پشتڕاستکراوەی بۆ کراوە. ئەم چەناڵە تەنیا بۆ ڕۆژنامەنووسانە و ئەمڕۆ دووشەممە ڕادەگەیێنرێت.

هێما نیازی دەشڵێت: ڕۆژانە داتا و زانیاری پێویست بۆ ڕۆژنامەنووسان بەردەست دەخرێت، لەهەمان کاتدا، ئەگەر ڕۆژنامەنووسێک پێویستی بە داتا و زانیاری بێت لەلایەن فەرمانگەی تەکنۆلۆجیای زانیاری و لە ڕێگای ئیمەیڵەوە زانیاریەکەی پێ دەدرێت.

بۆچی گرنگە: ئەم هەنگاوەی فەرمانگەی تەکنۆلۆجیای زانیاری لە پێناو بەرەوپێشبردنی شەفافیەت، پێدانی زانیاری فەرمی و ورد و هەنگاوێکیشە بۆ پاراستنی هاونیشتمانیان لە زانیاری ناڕاست.