پۆلیسی سلێمانی لەسەر گرتە ڤیدۆیەکی سۆشیال میدیا هاتە دەنگ

ئاڤا نیوز

دوو ڕۆژە ڤیدیۆی کچێک لە سۆشیال میدیا کاردانەوەی جیاوازی دروستکردووە. ئەو کچە لە ڤیدیۆکە باس لەوە دەکات کەسێک بە ئۆتۆمبێلێکی جام ڕەشەوە گێچەڵی پێکردووە. وتەبێژی پۆلیسی سلێمانی لەوبارەیەوە دەڵێت "ڤیدیۆکە بۆ داواکاری گشتیی دەنێرین تا سکاڵا بجووڵێنێت".

چیرۆکی سەرەکی: کچێک گرتە ڤیدۆیەکی بڵاوکردووەتەوە دەڵێت: لە ترافیک ئۆتۆمبێلێکی بەرز لە تەنیشتم وەستا و شۆفێرەکە دابەزی گێچەڵی پێکردم و ئەمەش ترسێکی زۆری لا دروست کردم. وەک ئەو کچە خۆی دەیڵێت "ئەو شۆفێرە کوڕە بەرپرس بووە".

لێدوانی فەرمی: سەرکەوت ئەحمەد، وتەبێژی بەڕێوەبەرایەتی پۆلیسی سلێمانی بە ئاڤای ڕاگەیاند: ئەمڕۆ ڤیدۆکەم لە سۆشیال میدیا بینیووە، ئێمە ناتوانین وەکو پۆلیسی سکاڵا بجووڵێنین، بۆیە گرتە ڤیدۆکە دەدەینە داواکاری گشتیی، لە ڕێگەی داواکاری گشتییەوە سکاڵا دەجووڵێنرێت و لێپێچێنەوە دەکرێت.

زانیاریی زیاتر: بەگوتەی وتەبێژی پۆلیس، دەبێت داواکاری گشتیی، یان ئەو کەسەی خۆی گرتەڤیدۆکەی کردووە بێت و سکاڵا تۆماربکات، ئەو کاتە ژمارەی ئۆتۆمبێلەکە بە بەڕێوەبەرایەتیی هاتووچۆ دەدرێت و لەو ڕێگەیەوە ئەو کەسەی گێچەڵەکەی کردووە دەدۆزێتەوە و لێپێچینەوەی لەگەڵ دەکرێت. یاسا بۆ هەمووان وەکو یەکە، بۆیە کەسی دەسترێژیکار کوڕی هەر کەسێک بێت خاتری ناگیرێت و لێپێچینەوەی یاسایی لەگەڵ دەکرێت.