شارەزایەکی یاسایی: سێیەکی گەرەنتی ئەمجارە لە دەستی سوننە و کورد دایە

ئاڤا نیوز

شارەزایەکی یاسایی ڕایدەگەیێنێت، نەخشەی سیاسی ئێستا بە ڕوونی نیشان دەدات کە پێکهاتەی سوننە لەگەڵ هێزە کوردییەکان، خاوەنی "سێیەکی گەرەنتیکەر و پەکخەرن" لە پرسی هەڵبژاردنی سەرۆککۆماردا، ئەمەش بەهۆی هاوسەنگیی پەرلەمانییەوە کە لە ئەنجامەکانی دواییدا دەرکەوتوون.

ئەوەی پێویستە بیزانیت: بەگوێرەی دەرئەنجامی دوایین هەڵبژاردن، سوننەو کورد بە یەکەوە خاوەنی 133 کورسین بە جۆرێک سوننەکان 77 کورسی و کورد 56 کورسی، لە بەرامبەردا هێزە شیعییەکان خاوەن 187 کورسین، ئەمە جیا لە کورسی کۆتای پێکهاتەکان.

لێدوانی ڕۆژنامەوانی: سالم حەواس، ڕاوێژکاری شارەزا لە بواری یاسایی، دەڵێت: ئەم سێیەکی گەرەنتییە تەنیا بۆ پۆستی سەرۆککۆمار نییە، بەڵکو بۆ پرسی ڕێککەوتن لەسەر دیاریکردنی گەورەترین کوتلەی پەرلەمانیش درێژ دەبێتەوە، چونکە ئەمە بنەمایەکی دەستوورییە کە ڕاسپاردەی سەرۆکوەزیران لێیەوە سەرچاوە دەگرێت.

وتیشی، فراکسیۆنە شیعەکان ئەمجارە خاوەنی زۆرینەی 220 کورسی نین کە وایان لێ بکات بە تەنیا بڕیار بدەن، لە کاتێکدا سوننە و کورد پێکەوە زیاتر لە سێیەکی کورسییەکانی پەرلەمانیان هەیە. ئەمەش توانای یاسایی و سیاسییان پێدەبەخشێت بۆ پەکخستن لە کاتی نەبوونی سازاندا.

زانیاریی زیاتر: بەگوتەی حەواس، خاوەندارێتی ئەم سێیەکە ڕۆڵێکی سەرەکی بە پێکهاتەی سوننە و  کورد دەبەخشێت لە بەڕێوەبردنی هاوسەنگییەکان؛ بەجۆرێک کە هەر بڕیارێکی چارەنووسساز جا لە هەڵبژاردنی سەرۆککۆماردا بێت یان دیاریکردنی گەورەترین فراکسیۆن دەوەستێتە سەر بوونی ڕێککەوتنێکی ڕاستەقینە کە ئەم لایەنانە بگرێتەوە و تێیان نەپەڕێنێت.

ئەم هاوسەنگییە نوێیە هێزە سیاسییەکان ناچار دەکات بنەمای هاوبەشیی ڕاستەقینە بگرنەبەر لەبری تەنیا بڕیاردان"، جەختی لەوەش کردەوە کە "سێیەکی گەرەنتیکەر و پەکخەر وەک فاکتەرێکی کاریگەر دەمێنێتەوە لە هێورکردنەوەی قەیرانەکان یان خراپترکردنیان، بەپێی ئاستی تێگەیشتن لە نێوان پێکهاتە سەرەکییەکان لە پرۆسەی سیاسیدا.