خزمەتگوزارییەکی نوێ لە "KRD Pass" بۆ هاووڵاتییان کارا دەکرێت

ئاڤا نیوز

خزمەتگوزارییەکی نوێ لە ئەپڵیکەیشنی کەی ئاڕدی پاس بۆ هاووڵاتییان کارا دەکرێت و دەتوانن لە ڕێگەی ئەپڵیکەیشنەکەوە سزای سەرپێچییەکانی هاتووچۆ ببینن، لە قۆناغی یەکەمیشدا بۆ دوو پارێزگا کارا دەکرێت. 

وێنە گەورەكە: حکومەتی هەرێمی کوردستان لە ڕێگەی فەرمانگەی تەکنەلۆژیای زانیاری، پڕۆژەیەکی ستراتیژی و گەورەی بەناوی "KRD Pass" دامەزراندووە، كە ئەپڵیکەیشنێکی زیرەک لەخۆدەگرێت و وەک جزدانێکی ئەلیکترۆنی کاردەکات؛ بە ئامانجی کۆتاییهێنان بە ڕۆتیناتی فەرمانگەکان و هەڵگرتنی جزدانێكی قورس و پڕ لە كاغەز و بەڵگەنامە، بەجێگەی ئەوە؛ دانانی سەرجەم خزمەتگوزارییە حکومییەکان بەشێوەی ئۆنڵاین.

لێدوانی فەرمی: هیوا ئەفەندی، سەرۆکی فەرمانگەی تەکنۆلۆژیای زانیاری بە ئاڤای ڕاگەیاند، لەم هەفتەیە بینینی سزای سەرپێچی شۆفێری لە ئەپڵیکەیشنەکە بۆ بەشداربووانی دهۆک بەردەست دەبێت و هەفتەی داهاتووش بۆ بەشداربووانی هەولێر کارا دەکرێت.

سەرۆکی فەرمانگەی تەکنۆلۆژیای زانیاری باسی لەوەشكرد: تاوەکو کۆتایی ساڵیش بەشداربووانی ئەپڵیکەیشنەکە دەتوانن پارەی کارەبا لەڕێگای ئەپڵیکەیشنی کەی ئاڕدی پاس بدەن، بەردەوامیش پرۆسەکە لە پێشکەوتندایە.