سەرۆكی پەرلەمانی توركیا: لە كۆبوونەوەكەی ئەمڕۆ بە وردی باس لە چەكداماڵینی پەكەكە كراوە

ئاڤا نیوز

سەرۆكی پەرلەمانی توركیا چەند زانیارییەك سەبارەت بە كۆبوونەوەی ئەمڕۆی نێوان كۆمسیۆنی یەكڕیزیی نیشتمانیی پەرلەمان و ئۆجەلان ئاشكرا دەكات.

چیرۆكی سەرەكی: کۆمیسیۆنی یەکڕیزیی نیشتمانیی پەرلەمانی تورکیا کە بۆ سەرخستنی پرۆسەی ئاشتی لەنێوان پەکەکە و حکومەتی تورکیا دامەزراوە، دوای 18 جار کۆبوونەوەی ناوخۆیی، ئەمڕۆ سەردانی عەبدوڵڵا ئۆجەلان، ڕێبەری زیندانیکراوی پەکەکەی کرد لە دوورگەی ئیمرالی، دوای گەڕانەوەشیان ڕاگەیێنراوێکیان بڵاو کردەوە. 

لێدوانی فەرمی: نوعمان كورتوڵموش، سەرۆكی پەرلەمانی توركیا ڕایگەیاند: كۆبوونەوەكەی كۆمسیۆنی یەكڕیزیی نیشتمانیی پەرلەمانی توركیا و عەبدوڵڵا ئۆجەلان ئەرێنی بووە، گفتوگۆی ورد سەبارەت بە ڕاگەیێنراوی پەكەكە و داماڵینی چەك لەدوای بانگەوازی ئاشتی و ڕێككەوتنی هەسەدە و حكومەتی سووریا كراوە.

گوتیشی: دیدارەكە ئەنجامی ئەرێنیی سەبارەت بە یەكگرتتی كۆمەڵایەتی و بەهزێتركردنی گیانی برایەتی و پێشخستنی پرۆسەی ئاشتی هەبووە، بڕیارە كۆمسیۆنەكە لەم هەفتەیەدا كۆببێتەوە و شاندەكە وردەكاریی كۆبوونەوەكەی ئەمڕۆ ئاشكرا بكات.

لەلایەكی دیكەوە: دەستەی سەرۆکایەتیی پەرلەمانی تورکیا ڕایگەیاند، کۆمیسیۆن چووەتە ئیمرالی، لەگەڵ عەبدوڵڵا ئۆجالان کۆبوونەتەوە، ئەنجامەکەی ئەرێنی بووە بۆ سەرخستنی پرۆسەی ئاشتی و پتەوکردنی برایەتی نێوان کورد و تورک، پرۆسەکە بە ئەرێنی هەنگاو دەنێت بەرەو ڕوانگەیەکی ناوچەیی.

جەختیش دەکاتەوە کۆمیسیۆنەکە هەڵوێستی یەکلاکەرەوەی خۆی دەپارێزێت و بەردەوام دەبێت لە گەیشتن بە ئامانجەکانی لە داهاتوودا.

زانیاریی زیاتر: ئەندامانی شاندەکە پێکهاتبوون لە گوڵستان کڵچ کۆچی غیت، جێگری سەرۆکی فراکسیۆنی دەم پارتی، حوسێن یایمان، یاریدەدەری سەرۆکی گشتیی ئاکپارتی و فەتی یەڵدز، یاریدەدەری سەرۆکی گشتیی مەهەپە بۆ کاروباری یاسایی و هەڵبژاردن، جەهەپە گەورەترین پارتی ئۆپۆزیسیۆنی تورکیا لە شاندەکە بەشدار نەبوو.