چوارچێوەی هەماهەنگی مەرج و پێوەرەکانی دیاریکردنی سەرۆکوەزیرانی تاوتوێ دەکات

ئاڤا نیوز

چوارچێوەی هەماهەنگی دوایین پێشهاتەکان و پرسە دەستووری و سیاسییەکانی قۆناغی داهاتووی عیراقیان تاوتوێ کرد و پێوەر و بنەما سەرەکییەکانی پۆستی سەرۆکوەزیران و میکانیزمی هەڵبژاردنی لە نێو چوارچێوەکەدا دیاری کرد. 

وێنە گەورەکە:  ئێوارەی ئەمڕۆ دووشەممە 24-11-2025، سەرکردەکانی هاوپەیمانیی چوارچێوەی هەماهەنگی لە نووسینگەی هادی عامری،  کۆبوونەوەی ژمارەی 251ـی ئاسایی خۆیان ئەنجامدا و تێیدا دوایین پێشهاتەکان و پرسە دەستووری و سیاسییەکانی قۆناغی داهاتووی عیراقیان تاوتوێ کرد.

ڕاگەیێنراوی فەرمی: بەگوێرەی ڕاگەیەندراوی فەرمانگەی میدیایی چوارچێوەی هەماهەنگی، لە کۆبوونەوەکەدا گفتوگۆ لەسەر پێوەر و بنەما سەرەکییەکانی پۆستی سەرۆکوەزیران و میکانیزمی هەڵبژاردنی لەنێو چوارچێوەکەدا کراوە. 

زانیاریی زیاتر: لەکۆبوونەوەکەدا جەخت لەوە کراوەتەوە کە دەبێت بۆ کاندیدکردنی سەرۆکوەزیرانی داهاتوو پشت بە پێوەری نیشتمانیی ڕوون ببەسترێت کە تێیدا لێهاتوویی، دەستپاکیی، توانای بەڕێوەبردنی دەوڵەت و ڕووبەڕووبوونەوەی ئاڵنگارییەکانی قۆناغی داهاتوو لەبەرچاو بگیرێن.

ئەمەش بزانە: هەروەها بەشداربووان گوێبیستی ڕاپۆرتی ئەو دوو لیژنە سەرکردایەتییە بوون کە لە کۆبوونەوەی پێشوودا پێکهێنرابوون، بڕیاریش درا کارەکانیان لە هەڵسەنگاندنی بەربژێرەکان و گفتوگۆکردن لەسەر ئیستحقاقە نیشتمانییەکان بەردەوام بێت تا ئەرکەکانیان تەواو دەکەن.