کەمپەینی ئاڤا بۆ پشتگیری لە هاندەرانی یانەی زاخۆ فراوانتر دەکرێت

ئاڤا نیوز

کەمپەینی پشتگیری ئاڤا میدیا لە هاندەرانی یانەی زاخۆ، بۆ بردنەوەی خەڵاتی "زەبێست" فراوانتر دەکرێت و ئەمڕۆ لە شاری سلێمانی چالاکییەکانی کەمپەینەکە دەست پێدەکات.

چیرۆکی سەرەکی: کەناڵی ئاڤا میدیا، کەمپەینی سەرخستنی هاندەرانی یانەی زاخۆ بۆ بردنەوەی خەڵاتی "زەبێست" ڕاگەیاندووە و شار بە شار چالاکی جۆراوجۆر ئەنجام دەدات و هانی هاووڵاتیان دەدات دەنگ بە یانەی زاخۆ بدەن، لەگەڵ نزیکبوونەوەش لە وادەی کۆتایی دەنگدان، کەمپەینەکەی ئاڤا میدیاش فراوانتر دەکرێت، لە پێناوی کۆکردنەوەی زۆرترین دەنگ بۆ هاندەرانی یانەی زاخۆ.

ئەوەی ئێستا ڕوودەدات: لە چوارچێوەی کەمپەینی سەرتاسەری ئاڤا میدیا بۆ پشتیوانیکردنی هاندەرانی یانەی زاخۆ، ئەمڕۆ سێشەممە 25-11-2025، لە بەردەم باخی گشتیی لە سلێمانی، لە ڕێگەی خێمەی ئاڤاوە چالاکییەکانی کەمپەینەکە ڕادەگەینرێت.

زانیاریی زیاتر: لە خێمەکەی ئاڤا میدیا، بەشێک لە ئەستێرەکانی ئاڤا و کارمەندانی لە پێشوازی ئەو کەسانە دەبێت کە بەشداری کەمپیەینەکە دەکەن، هاوکات تیمێکی تایبەتی داناوە بۆ هاوکاریکردنی هاونیشتمانیان لە دەنگدان بە هاندەرانی یانەی زاخۆ.

ئەوەی پێویستە بیزانیت: دەنگدان بە هاندەرانی یانەی زاخۆ، بۆ ئەوەی خەڵاتی باشترین هاندەرانی جیهان بۆ ساڵی 2025 ببەنەوە، لە ڕێگەی وێبسایتی یەکێتیی تۆپی پێی جیهان دەبێت، دەنگدانیش تا 28ـی ئەم مانگە بەردەوام دەبێت.

بۆچی گرنگە: بە بردنەوەی خەڵاتی "زەبێست"، هاندەرانی یانەی زاخۆ دەچنە سەر نەخشەی وەرزشی جیهان و لە پاڵ باشتریینەکانی تۆپی پێ لە جیهان خەڵات دەکرێن، ئەمەش دەسکەوتێکی گرنگە بۆ ناو و ناوبانگی وەرزشی هەرێمی کوردستان.

باکگراوند: یەکێتی تۆپی پێی جیهان (فیفا)، سێ بەربژێری دەستنیشان کردووە بۆ بردنەوەی خەڵاتی باشتیرن هاندەر لە جیهان، هاندەرانی یانەی زاخۆی یەکێکن لەو سێ بەربژێرانە، بۆ بردنەوەی خەڵاتەکەش دەنگدانی ئەلیکترۆنی دەکرێت و خاوەنی زۆرترین دەنگ، خەڵاتەکە دەباتەوە.

ئەمەش بزانە: یەکێتی تۆپی پێی جیهان، ساڵانە خەڵاتی "زەبێست"، بە باشترینەکانی جیهان دەبەخشێت، ئەوانیش، باشترین یاریزان، باشترین گۆڵکار، باشترین گۆڵچی، باشترین ڕاهێنەر، باشترین پێکهاتەی تۆپی پێ، جوانترین گۆڵ، باشترین هاندەر.