ئەنجومەنی سووریای دیموکرات: ئیدارەی ئەمریکا لەگەڵ ئەحمەد شەرع باسی سەقامگیری ڕۆژئاوای کوردستانی کردووە

ئاڤا نیوز

نوێنەری ئەنجوومەنی سووریای دیموکرات لە ئەمریکا ئاشکرای دەکات، لە کاتی سەردانی ئەحمەد شەرع بۆ واشنتۆن، یەکێک لەو پرسانەی ئیدارەی ئەمریکا لەگەڵ شەرع باسیکردووە، بابەتی سەقامگیری ڕۆژئاوای کوردستان بووە.

وێنە گەورەکە: ئەگەرچی زیاتر لە هەشت مانگە ڕێککەوتن لە نێوان مەزڵووم عەبدی، فەرماندەی گشتیی هەسەدە و ئەحمەد شەرع واژۆ کراوە، بەڵام هێشتا هیچ یەک لە خاڵەکانی ئەو ڕێککەوتنە جێبەجێ نەکراون.

لێدوانی فەرمی: بەسام ئیسحاق، نوێنەری ئەنجوومەنی سووریای دیموکرات (مەسەدە) لە ئەمریکا بە ئاژانسی هاوار نیوزی ڕاگەیاندووە، ئەو کاتەی ئەحمەد شەرع سەردانی ئەمریکای کردووە، ئیدارەی ترەمپ، باسی چۆنیەتی پاراستنی سەربەخۆیی سیاسی و ئیداری باکوور و ڕۆژهەڵاتی سووریا (ڕۆژئاوای کوردستان)ـی لەگەڵ کردووە و پێی ڕاگەیێنراوە، پێویستە دۆخی هەستیاری ئەو ناوچانە لەبەرچاو بگیرێن.

نوێنەری مەسەدە دەشڵێت: لە گفتوگۆکان باسی دامەزراوەکانی دەوڵەت کراوە کە پێویستە بە شێوەیەکی ورد ڕێککەوتنی لەسەر بکرێت. هاوکات باسی ئەزموونە زۆرەکانی هەسەدە کراوە بۆ ڕووبەڕوونەوەی داعش و پێویستە حکومەتی نوێی سووریا سوود لە ئەزموونەکانی وەرگرێت.

ئەوەی پێویستە بیزانیت: ڕۆژی 8ـی ئەم مانگە، ئەحمەد شەرع، سەرۆکی سووریا لە کۆشکی سپی لەگەڵ ترەمپ کۆبوویەوە و بڕیاردرا سزاکانی سەر سووریا بۆ ماوەیەکی دیاریکراو هەڵبگیرێن و حکومەتی نوێی سووریا پەیوەست بکرێت بە هاوپەیمانییەتی نێودەوڵەتی دژی داعش.