گۆڕهەڵکەنێکی غەززە: لە سەرەتای جەنگەوە 18 هەزار تەرممان بەخاک سپاردووە

ئاڤا نیوز

دوای تێپەڕبوونی زیاتر لە مانگێک بەسەر جێبەجێکردنی ئاگربەست لە کەرتی غەززە، ژمارەیەکی زۆر لە گۆڕ لەنێو ماڵە وێرانبووەکان، شوێنە گشتییەکان و زەوییە کشتوکاڵییەکاندا دۆزراونەتەوە و گۆڕهەڵکەنێکيش دەڵێت: لە سەرەتای جەنگەوە 18 هەزار تەرممان بەخاک سپاردووە.  

وێنە گەورەکە:  بەپێی ئامارەکانی وەزارەتی تەندروستی فەڵەستین لە کەرتی غەززە، لە حەوتی ئۆکتۆبەری 2023 ـەوە نزیکەی 69 هەزار کەس زۆربەیان ژن و منداڵن کوژراون، هەروەها ژمارەیەکی زۆر قوربانی لەژێر داروبەردی بینا رووخاوەکاندا ماونەتەوە، بۆیە دوای ئەوەی گۆڕستانەکان  پڕبوونەوە و غەززە پڕبووە لە گۆڕی هەڕەمەکی، بەرگری شارستانیش بە هاوکاری وەزارەتی تەندروستی و هاووڵاتیان هەوڵی گواستنەوەی تەرمەکان لە گۆڕە هەڕەمەکییەکانەوە (کە لەنێو زانکۆکان و نەخۆشخانەکانیشدا هەن) بۆ گۆڕستانەکان دەدەن.

لێدوانی فەرمی: تافش ئەبو حەتەب، کە زیاتر لە 20 ساڵە وەک گۆڕهەڵکەن لە گۆڕستانی خان یونس لە باشووری کەرتی غەززە  کار دەکات، ڕایگەیاند : ڕۆژانە دەیان فەڵەستینی بەخاک دەسپێرێت کە زۆربەیان ژن و منداڵن، تەنانەت هەندێک خێزان بەتەواوی لە تۆمارە مەدەنییەکان سڕاونەتەوە.

زانیاریی زیاتر: ئەبو حەتەب ئاماژەی بەوەکرد، بەهۆی دۆخی جەنگ و گەمارۆی توند و داخستنی دەروازەکان، ئێستا تێچووی گۆڕێک و  ناشتنی مردوویەک لەغەززە نزیکەی 300 دۆلارە، بۆیە ناچارن پاشماوەی خانوو و باڵەخانە وێرانبووەکان وەک جێگرەوەی بلۆک و چیمەنتۆ بەکاربهێنین، کە ئەوەش تێچوو و ماندووبوونی دەوێت و هێشتا بۆ خەڵکی هەژار گرانە.

ئەمەش بزانە: ئەو گۆڕهەڵکەنە ڕوونیکردەوە، لەگەڵ خێرخوازان گۆڕی بەکۆمەڵیان بێبەرامبەر دابین کردووە کە جێگەی 15 بۆ 20 تەرمی تێدا دەبێتەوە و داواشی لە خێرخوازان کرد بەپەلە هاوکاری بگەیێنن تا مردووەکان بە شێوەیەکی شایستە بنێژرێن، چونکە بە هاتنی وەرزی زستان دۆخەکە سەختتر دەبێت و مەترسی ئەوە هەیە ئاو بچێتە نێو گۆڕەکان و تەرمەکان دەربکەونەوە.

 
لەلایەکی دیکەوە: ئیبراهیم ئەسلیح، بەڕێوەبەری کۆمەڵەی "قیراتان"ی خێرخوازی، دەڵێت " قەیرانەکە تەنیا لە گۆڕدا نییە، بەڵکو کفنیش دەست ناکەوێت، ڕۆژانە بەناچاری لەبەردەم دەیان تەرمدا دەوەستبن و کفن یان تەنانەت کیسەی پلاستیکیش بۆ داپۆشینیان دەست ناکەوێت"