ئەمریكا: دەمانەوێت هەناردەکردنی نەوتی کوردستان بەردەوام بێت

ئاڤا نیوز

 

باڵیۆزخانەی ئەمریكا لە عێراق ڕایدەگەیەنێت، پرسی هەناردەکردنەوەی نەوتی هەرێمی كوردستان بابەتێكی ستراتیژی و گرنگە لای ئیدارەی واشنتن و جەخت لەوە دەکاتەوە کە دەبێت ڕێکكەوتنی سێقۆڵی نێوان هەرێم، بەغداد و كۆمپانیاکان درێژخایەن بێت.

 

ڕاگەیێنراوی فەرمی: بەگوێرەی ڕاگەیێنراوی وەزارەتی سامانە سرووشتییەکانی کوردستان، ئەمڕۆ سێشەممە، کەمال محەممەد ساڵح، وەزیری سامانە سرووشتییەکانی حکومەتی هەرێمی كوردستان (بە وەکالەت)، پێشوازی لە چاشوا هاریسۆن، هەڵسوڕێنەری باڵیۆزخانەی ئەمەریکا و شاندێکی یاوەری کرد.

 

لە کۆبوونەوەکەدا گفتوگۆ لەسەر دوایین پەرەسەندنەكانی پرسی هەناردەكردنەوەی نەوت، زیادبوونی بەرهەمهێنان و شایستە داراییەكانی كۆمپانیاکانی نەوت کرا.

 

ئەوەی پێویستە بیزانیت: هەڵسوڕێنەری باڵیۆزخانەی ئەمەریکا پشتیوانیی وڵاتەکەی بۆ وەبەرهێنان لە کەرتی نەوتی کوردستان دووپاتکردەوە و ڕایگەیاند: "ئەمریكا خوازیاری ئەوەیە ڕێکكەوتنی سێ لایەنەی نێوان هەرێم، بەغداد و كۆمپانیا بیانییەكان بۆ هەناردەکردنی نەوت، ڕێککەوتنێکی بەردەوام و درێژخایەن بێت و سەرجەم ئەو ئاستەنگ و گرفتانەی دێنە بەردەم ڕێککەوتنەکە چارەسەر بکرێن."

 

لەلایەکی دیکە: بەگوێرەی ڕاگەیێنراوەکەی وەزارەتی سامانە سرووشتییەکان تەوەرێکی دیکەی کۆبوونەوەکە تایبەت بوو بە گفتوگۆکردن لەسەر پەیوەندییەکانی نێوان وەزارەتی نەوتی عێراق و سامانە سرووشتییەكان، بەتایبەت چارەسەركردنی گرفتە تەكنیكییەكان. لەم چوارچێوەیەدا شاندی میوان دەستخۆشییان لە وەزارەتی سامانە سرووشتییەكان كرد بۆ پابەندبوونیان بە ڕێكکەوتنی سێ لایەنەی نێوان وەزارەتەکە و وەزارەتی نەوتی عێراقی فیدراڵ و كۆمپانیای سۆمۆ و كۆمپانیاكانی بەرهەمهێنانی نەوت.

 

باکگراوند؛ ئێستا ڕێككەوتنێكی نەوتی لەنێوان هەردوو حكومەتی فیدراڵی عێراق و حكومەتی هەرێمی كوردستاندا هەیە و لە بەرواری 31-12-2025 کۆتایی دێت، ئەمەش وادەکات پێویستی بە نوێکردنەوە یان گەیشتن بە ڕێککەوتنێکی نوێ هەبێت تا ئەوكاتەی بودجەی ساڵی 2026ـی فیدراڵ پەسەند دەكرێت.