زانیاریی نهێنی کۆبوونەوەکەی ترەمپ و بن سەلمان ئاشکرا دەکرێت: ترەمپ لە بن سەلمان تووڕەیە

 ئاڤا نیوز 

 

بەرپرسانی ئەمریکا وردەکاریی کۆبوونەوەی هەفتەی ڕابردووی نێوان دۆناڵد ترەمپ، سەرۆکی ئەمەریکا و محەممەد بن سەلمان، شازادەی جێنشینی سعودیە ئاشکرا کرد، کە تێیدا سەبارەت بە پرسی ئاساییکردنەوەی پەیوەندییەکان لەگەڵ ئیسرائیل گرژیی کەوتووەتە نێوان هەردووکیانەوە.

 

زانیاریی بەدەستهاتوو: دوو بەرپرسی باڵای ئەمریکی و سەرچاوەیەکی ئاگادار بە کەناڵ 12ی ئیسرائیلیان ڕاگەیاندووە، سەرەڕای ئەوەی ترەمپ و محەمەد بن سەلمان لە بەردەم کامێراکاندا ستایشی یەکتریان کردووە، بەڵام لە پشت دەرگا داخراوەکانەوە گفتوگۆیەکی توندییان لەگەڵ یەکدا کردووە.

 

لە کۆبوونەوەکەدا، ترەمپ بە شێوەیەکی ڕاستەوخۆ و بە فشارەوە داوای لە شازادەی جێنشینی سعودیە کردووە ببێتە بەشێک لە ڕێککەوتنەکانی ئیبراهیمی.

 

ئەوەش بزانە: لەو کاتەدا دۆخەکە گرژی تێکەوتووە، شازادەی جێنشینی سعودیە بە ترەمپی ڕاگەیاندووە، ئەگەرچی دەیەوێت پەیوەندییەکانیان لەگەڵ ئیسرائیل ئاسایی بکەنەوە، بەڵام لە ئێستادا ناتوانێت ئەو کارە بکات. هۆکارەکەشی بۆ ئەوە گەڕاندووەتەوە کە دوای جەنگی غەززە، سعودییەکان بە توندی دژی ئیسرائیلن و کۆمەڵگەی سعودیە ئامادەی ئەو هەنگاوە نییە.

 

ئەوەی پێویستە بیزانیت: بەرپرسێکی ئەمریکی بە کەناڵە ئیسرائیلییەکەی وتووە، ترەمپ زۆر بێهیوا و توڕە بووە لە شازادەی جێنشینی سعودیە و زۆر هەوڵیدا قەناعەتی پێ بکات، بەڵام محەممەد بن سەلمان سور بووە لەسەر هەڵوێستەکەی.

 

لەلایەکی دیکەوە: بیانووی سەرەکی محەممەد بن سەلمان بۆ ترەمپ ئەوە بووە، دەبێت ئیسرائیل ڕازی بێت بە نەخشەڕێگایەکی باوەڕپێکراو و دیاریکراو بۆ دامەزراندنی دەوڵەتی فەڵەستین.

 

لە تەنیشت ئەم بابەتەوە: لە بەشێکی دیکەی قسەکانیاندا، ترەمپ بەڵێنی بە شازادەکەی سعودیە داوە کە هەمان ئەو فڕۆکە جەنگییە پێشکەوتووانەی جۆری (F-35)ـی پێ بدات کە ئیسرائیل هەیەتی. بەڵام ڕۆژێک دواتر، مارکۆ روبیۆ، وەزیری دەرەوەی ئەمریکا پەیوەندی بە بنیامین نەتانیاهۆوە کردووە و دڵنیایی پێ داوە کە ئەو فڕۆکانەی دەدرێنە سعودیە وەشانیان نزمتر دەبێت لەوانەی بە ئیسرائیل دراون.