دەستەی دادوەریی هەڵبژاردنەکانی عێراق 36 تانەی ڕەت کردەوە

ئاڤا نیوز

 

لە کۆی وەڵامی کۆمیسیۆن بۆ 406 تانەی لایەنەکان کە ئاڕاستەی کرابوو و ئەویش بۆ دەستەی دادوەریی هەڵبژاردنەکانی ناردبوو، دەستەکە وەک هەنگاوی یەکەم 36 تانەی ڕەتکردەوە.

 

وێنە گەورەکە: بۆ وەڵامدانەوەی ئەو 872 تانەیەی لەسەر ئەنجامەکانی هەڵبژاردنی پەرلەمانی عێراق تۆمارکراون، کۆمیسیۆنی هەڵبژاردنەکانی عێراق حەوت ڕۆژی کارکردنی لەبەردەمە، بەوپێیەش تاوەکو سەرەتای مانگی داهاتوو دەبێت وەڵامی هەموو تانەکان بداتەوە و ئاڕاستەی دەستەی دادوەری هەڵبژاردنەکانی بکات.

 

لێدوانی فەرمی:  جومانە غەلای، گوتەبێژی کۆمیسیۆنی باڵای سەربەخۆی هەڵبژاردنەکانی عێراق بە ئاڤا میدیای ڕایگەیاند، تا دوێنێ کۆمیسیۆن وەڵامی خۆی بۆ 406 تانە ئامادە کردووە و ئەمڕۆش وەڵامی 122 تانەی دیکە دەدەنەوە بەکۆی گشتیش دەکاتە وەڵامی 528 تانە، واتە بە ئەمڕۆوە وەڵامی کۆمیسیۆن بۆ 60%ـی تانەکان تەواو دەبێت و بۆ دەستەی دادوەری هەڵبژاردنەکانی دەنێرن.

 

وتیشی، وەک هەنگاوی یەکەم و هەرچەندە دەیتوانی دوای 2ـی مانگی داهاتوو دەست بە یەکلاییکردنەوەی تانەکان بکات، بەڵام دەستەی دادوەریی هەڵبژاردنەکانی عێراق ئەمڕۆ 36 تانەی لایەنەکانی ڕەتکردەوە، بڕیارەکانی دەستەکەش پابەندکارن و بەهیچ شێوەیەک تانەیان لێنادرێت.