کوردستان فاوندەیشن پێشانگایەکی هەلی کار لە زاخۆ دەکاتەوە

ئاڤا نیوز

 

کوردستان فاوندەیشن لەڕێگەی (جۆبس کەی ئار دی jobs krd) پێشانگایەکی هەلی کار لە زاخۆ دەکاتەوە و زیاتر لە 100 هەلی کار دەڕەخسێنێت.

 

وێنە گەورەکە: گەنجانێکی زۆری دەرچووی زانکۆ هەن بەدوای کاردا دەگەڕێن، زۆرجار پێشانگاکانی هەلی کار دەبنە سەکۆیەک بۆ بەیەکگەیاندنی کارخواز و خاوەنکار، لەو سۆنگەیەوە کوردستان فاوندەیشن لەڕێگەی (جۆبس کەی ئار دی  jobs krd) پێشانگایەکی هەلی کار لە زاخۆ دەکاتەوە.

 

لێدوانی فەرمی: ساکار عومەر، بەڕێوەبەری پەیوەندییە گشتییەکان لە کوردستان فاوندەیشن بە ئاڤا میدیای ڕاگەیاند، سبەی پێنجشەممە 27-11-2025 پێشانگای هەلی کاری دەلال لەناو زانکۆی زاخۆ دەکرێتەوە، لە کاتژمێر 10:00ـی بەیانی تاوەکو کاتژمێر 04:00ـی ئێوارە بەردەوام دەبێت.

 

زانیاریی زیاتر: لە پێشانگاکە 30 کۆمپانیای ناوخۆیی و نێودەوڵەتی بەشدار دەبن، زیاتر لە 100 هەلی کار دەڕەخسێنێت، بەشی سەرچاوەی مرۆیی کۆمپانیاکان ئامادە دەبن و چاوپێکەوتن لەگەڵ کارخوازان ئەنجام دەدەن.

 

ئەمەش بزانە: پلاتفۆرمی (جۆبس کەی ئار دی jobs krd) یەکێکە لە کاراترین پلاتفۆرمەکان بۆ بەردەستکردنی هەلی کار، تائێستا زیاتر لە 30 هەزار کارخواز و 900 کۆمپانیا ناویان تۆمار کردووە بۆئەوەی هەلیکارەکانیان لەڕێگەی ئەم پلاتفۆرمە بڵاو بکەنەوە، هەمیش کارخوازەکان کاریان دەستبکەوێت.