ڕۆژنامەنووسەكەی گەرمیان بەكەفالەتی دوو ملیۆن دینار ئازاد کرا

ئاڤا نیوز

ڕۆژنامەنووسەكەی گەرمیان بە كەفالەتی دوو ملیۆن دینار ئازاد کرا و تۆمەتی ناوزڕاندنیشی دراوەتە پاڵ.

چیرۆکی سەرەکی: ئێوارە ڕۆژی سێشەممە 25-11-2025، هێزێکی ئەمنی یەکێتی لە قەزای کەلار، ڕۆژنامەنووس کاروان کەلاری؛ بەڕێوەبەری ڕادیۆی کازیوەی دەستگیرکردووە، تا ئەمڕۆش سۆراغیشی نەبوو. بەگوتەی بەرپرسێكی حیزبی، ئەو هێزەی ڕۆژنامەنووسەكەیان بردووە، لە بەشی ئۆپەراسیۆنی هێزەكانی ئاسایشی سلێمانی بوونە و بەرەو شاری سلێمانی بردوویانە.

زانیاریی پەیامنێر: هەڵۆ گەرمیانی، پەیامنێری ئاڤا لە ئیدارەی گەرمیان لەگەڵ پارێزەری ڕۆژنامەنووس، كاروان كەلاری قسەی كردووە، وتویەتی ناوبراو بە تۆمەتی ناوزڕاندن دەستگیر كراوە و بە كەفالەتی دوو ملیۆن دینار ئازاد کرا.

پەیوەست بەم بابەتە: هەریەك لە دەستەی سەربەخۆی مافی مرۆڤ و سەندیكای ڕۆژنامەنووسانی كوردستان و سەنتەری میترۆ بۆ داكۆكیكردن لە ڕۆژنامەنووسان، سەرەڕای دەربڕینی نیگەرانی و ئیدانەكردنی گرتن و بێسەروشوێنكردنی ڕۆژنامەنووسان، هاوكات لەڕێگەی نووسینگەی گەرمیانی دەستەی سەربەخۆی مافی مرۆڤ بەدواداچوونیان بۆ سۆراغی كاروان كەلاری كردووە و زانراوە لە ئاسایشی سلێمانی گیراوە.