ئاڤا وردەکاری دادگاییکردنی لاهوور شێخ جەنگی ئاشکرا دەکات

ئاڤا نیوز

سەرۆکی تیمی پارێزەرانی لاهوور شێخ جەنگی دەڵێت، دادگای سلێمانی ناتوانێت لاهوور و هاوڕێکانی دادگایی بکات.

زانیاریی تایبەت: لەم چەند ڕۆژە بافڵ تاڵەبانی، سەرۆكی یەكێتیی نیشتمانی كوردستان لەگەڵ چەند دیپلۆماتكارێكی بیانی كۆبووەتەوە و تاوتوێی چەند پرسێكیان كردووە، یەكێك لە پرسەكانی كۆبوونەوەكە بابەتی دەستگیركردنی لاهوور شێخ جەنگی و پۆڵادی برای و چەند كەسێكی دەورووبەری بووە.

زانیاریی بەدەستهاتوو: بەپێی زانیارییەكان لە كۆبوونەوەكەدا بافڵ تاڵەبانی بە دیپلۆماتكارەكانی وتووە، هەفتەی داهاتوو دادگاییكردنی لاهوور شێخ جەنگی و پۆڵاد و دەستگیركراوەكانی دیكەی لالەزار لە شاری سلێمانی بەڕێوەدەچێت.

ئاماژەی بەوەش داوە كە دادگاییكردنەكە بەشێوەیەكی شەفاف و كراوە بەڕێوەدەچێت، تۆمەتەكانی سەر لاهوور و هاوڕێكانی لەنێو دادگا دەخرێنە ڕوو و یەكلاییش دەكرێنەوە.

لێدوانی فەرمی: بورهان ڕەشید گوڵە، سەرۆكی تیمی پارێزەرانی لاهوور شێخ جەنگی بە ئاڤای ڕاگەیاند: دادگای سلێمانی ناتوانێت لاهوور شێخ جەنگی و هاوڕێكانی دادگایی بكات، چونكە ئێمە نووسراوی فەرمیی دادگای تەمیزمان هێناوە و دەبێت پێداچوونەوە بە پەڕاوەكانیان بكرێت و دادگاییكردنی لاهوور شێخ جەنگی و هاوڕێكانی بگوازرێتەوە بۆ هەولێر، بۆیە چاوەڕوانین دادگای تەمیز بابەتەكە یەكلا بكاتەوە.

ئەمەش بزانە: لاهوور شێخ جەنگی و هاوڕێ و كەسە نزیكەكانی تۆمەتبار كراون بە ماددەی 406 كە تایبەتە بە كوشتنی پلان بۆداڕێژراو و بەمەبەست.