حكومەتی ئەڵمانیا پشتیوانیی ئەنجامدانی یاریی دۆستانەی نێوان دهۆك و شتوتگارت دەكات

ئاڤا نیوز

هەوڵەكان لەپێناو ڕێكخستنی یارییەكی دۆستانە لەنێوان هەردوو یانەی دهۆك و شتوتگارتی ئەڵمانی چڕ دەكرێنەوە، حكومەتی ئەڵمانیاش پشتیوانیی ئەو داواكارییە دەكات.

چیرۆكی سەرەكی: ئێستا د. عەلی تەتەر، پارێزگاری دهۆك بە سەردانێكی فەرمی لە هەرێمی بادن-ڤووتەمبێرگە لە ئەڵمانیا، چەندین كۆبوونەوە و دیداری گرنگی لەگەڵ بەرپرسانی هەرێمەكە و حكومەتی فیدراڵیی ئەڵمانیا كردووە، ئەمڕۆش لەگەڵ فلۆریان هاسلەر، وەزیری یەكەمی هەرێمی بادن-ڤووتەمبێرگ بۆ كاروباری ئەنجوومەنی وەزیران كۆبووەوە.

لێدوانی فەرمی: د. عەلی تەتەر، پارێزگاری دهۆك ڕایگەیاند، لەگەڵ وەزیری هەرێمی بادن-ڤووتەمبێرگ بۆ كاروباری ئەنجوومەنی وەزیرانی ئەڵمانیا، سەردانی یانەی شتوتگارتمان كرد، هەوڵەكان بۆ ڕێكخستنی یارییەكی دۆستانە لەنێوان یانەی دهۆك و یانەی شتوتگارتی ئەڵمانی بەردەوامن، حكومەتی ئەڵمانیاش پشتیوانیی بەڕێوەچوونی ئەم یارییە دەكات و داواشكراوە، شاندێكی یانەكە سەردانی پارێزگای دهۆك بكەن.

زانیاریی زیاتر: ڕێككەوتنی فەرمی لەنێوان پارێزگای دهۆك و هەرێمی بادن-ڤووتەمبێرگی ئەڵمانی واژۆ كراوە، یەكێك لە بڕگە سەرەكییەكانی ڕێككەوتنەكە، هاریكاریكردنە لە سێكتەری وەرزش لەپێناو سوودوەرگرتن لە ئەزموونی دەوڵەمەندی ئەڵمانیا.

باكگراوند: یانەی دهۆك بە بردنەوەی نازناوی كۆپی یەكەمی جامی یانە پاڵەوانەكانی كەنداو لە ساڵی ڕابردوودا، لەپاڵ بردنەوەی چەندین نازناو و پاڵەوانیەتیی ناوخۆی عێراق، ئێستا ناوێكی گەورەی جیهانی وەرزشە، بۆیە یانەیەكی گەورە و ناوداری هاوشێوەی یانەی شتوتگارت كە لەسەر ئاستی جیهان و ئەڵمانیا ناسراوە، بە ئەگەرێكی زۆرەوە بە داواكارییەكەی هەڵۆ زەردەكانی شاخ ڕازی دەبێت و لە ئاییندەیەكی نزیكدا ئەو مێژووە دەنووسرێتەوە.